Miembronan di Tweede Kamer ta preocupa pa tension creciente entre Merca y Venezuela

DEN HAAG – Miembronan di Tweede Kamer Mikal Tseggai y Kati Piri (ambos GroenLinks-PvdA) a pidi aclaracion di gobierno Hulandes tocante e tensionan creciente entre Merca y Venezuela. Motibo ta un emision reciente di Nieuwsuur unda habitantenan di Corsou, Aruba y Boneiro a expresa preocupacion tocante accionan di Merca contra barconan sospechoso den laman Caribense.

Den un serie di preguntanan scribi, e miembronan kier sa con e gabinete ta mira e atakenan di Merca riba botonan cu e pais ta considera parti di trafico di droga. Varios organisacionan internacional, incluyendo Naciones Unidas y gobierno Frances, a critica e atakenan pasobra nan por ta contra regla internacional.

ROL DI E REINO

Tseggai y Piri ta puntra e ministeronan si Hulanda, mescos cu Reino Uni y Canada, ta considera pa para temporalmente cu comparti informacion cu Merca. Nan tambe kier garantia cu cooperacion di kustwacht den Reino Hulandes cu Merca, unda entre otro e aeropuerto na Corsou ta wordo usa, no ta contribui den niun forma na accionan cu ta contra regla internacional.

PREOCUPACION RIBA E ISLANAN

Ademas, e miembronan ta puntra con e gabinete ta traha hunto cu gobierno di Corsou y Aruba y cu cuerpo publico Boneiro pa calma e pueblo. Nan ta insiste riba comunicacion cla y na tempo direccion di habitantenan di e tres islanan pa preveni cu e relacionan politico den Reino ta causa confushon of falta di informacion.

PIDI PA UN CONTESTA RAPIDO

E miembronan di Kamer a pidi cu gobierno ta contesta e preguntanan den un siman.