Na Corsou ta dicta sentencia contra ex parlamentario awe

WILLEMSTAD - Awe korte di promé instansia lo dikta sentensia den kaso di e lider polítiko di KEM i eks parlamentario  sr. Michelangelo ‘LO’ Martines. Dia 20 di ougùstùs último Ministerio Públiko a hasi un demanda di 8 aña di prizòn pa “Lo”, pa su supuesto envolvimentu den diferente kaso di trafikashon di droga i tambe labamentu di plaka.

T’asina ku Martines a presentá dilanti wes  akusá di kuater kaso di trafikashon di droga i tambe labamentu di plaka. Durante tratamentu di e kaso Ministerio Públiko a separá su presentashon den dos, lagando e parti di trafikashon pa un fiskal i e parti di labamentu di plaka pa otro kolega.

Segun fiskal den kasonan di trafikashon di droga den kual tin hopi plaka envolví, semper tin sistemanan pa e plaka sirkulá di un forma ‘underground’ pa asina por kubri gastunan envolví, pasobra e grupo akí no por yega na ningun banko i habri un kuenta. Di akuerdo ku e investigashonnan, Martines a laba plaka den e periodo di 2019-2024. No tin duda pasobra for di su kontaktonan por dedusí ku e tabatin un ròl importante den e preparashon, tuma plaka i pago. Ta hopi plaka ta lora den e negoshi akí, segun fiskal.

Djis pa duna algun ehèmpel, den su kontaktonan e tabata referí na pagonan di $100.000, i te asta €1 mion. Meimei e tabata papia di pagonan di $26.000 i €35.000. Un di su kontaktonan prinsipal den henter e negoshi akí tabata un tal “Mono”, ku ta un persona di Colombia, kende probablemente tabata sòru pa e haña e droga na Panamá i transportá esaki pa Europa.

Segun fiskal, ta konosí ku Martines tabata parlamentario, pues ta masha improbabel ku e tabatin tantu plaka asina pa kubri asuntunan den eksterior. Si konsiderá su karchi di kastigu, por mira ku Martines a kai será na diferente okashon pa trafikashon, i ora ku el a drenta polítika el a kontinuá manera nada no a pasa.

DEMANDA:

Dia di e demanda, fiskal a dirigí su mes na Martines i a bis’é ku e ta lamentá ku e akusado ta tilda Ministerio Públiko di a hunga wega shushi kuné i ku esaki lo tin di aber ku polítika. OM ta hasi un trabou pa defendé e komunidat akí i konsientemente ta keda leu for di polítika, segun e fiskal. Miembronan den e órgano aki ta hasi nan bèst tur dia pa kombatí kriminalidat, pues no por papia di kòmplòt. I finalmente el a konsiderá ku 8 aña lo ta e kastigu apropiá pa Martines. Awe den oranan di mèrdia korte di promé instansia lo dikta sentensia. NOTA: Texto ta scirbi den papiamento fonetico di Corsou.