Tension rond Venezuela: ‘Trump no ta interesa den droga, sino den cambio di regimen’

WASHINGTON - Merca ta conduciendo accionan militar pa lunanan largo den awa rond Centro y Sur America. Segun presidente Mericano Trump, su pais ta defende su mes contra boto di droga cu ta sali entre otro di Venezuela pa bai Merca. Pero e no ta presenta ningun prueba cu realmente ta trata di transportacion di droga.

Cu e anuncio di un operacion militar grandi y e yegada di e portavion mas grandi di mundo den e region, tension entre Merca y Venezuela a subi hopi mas e siman aki. Cua ta e plan di America cu e flota di guera cu barconan di marina y un submarino nuclear? Cinco pregunta tocante e conflicto.

MERCA TA REALMENTE INTERESA DEN COMBATI DROGA?

Conocedo di Venezuela y periodista hulandes Edwin Koopman no ta pensa asina, aunke Venezuela si ta un pais di transito importante pa coca. Binti porciento di exportacion di coca pa Merca ta pasa via Venezuela. “Ochenta porciento ta bai via otro ruta, pero si ta algo. Solamente no ta fentanyl, e droga cu Trump a declara guera riba dje.”

E botonan cu Merca a ataca den ultimo lunanan por tabata efectivamente transportacion di droga, segun Koopman. “No tin prueba, pasobra nan a mandabom riba nan, pero bo no ta pone un motor asina grandi tras di bo boto pa nada. Y mas important ainda: ta cuestionabel si bo por simplemente bombardea boto den awa internacional, esaki ta contra drechi internacional.”

DICON  CAS BLANCO TA SIGUI SUBI PRESION?

Gobierno Mericano no ta sconde cu Merca tin meta pa cambio di regimen: Core cu presidente Maduro y su gobierno.

“Trump tin mira principal riba lidernan izquierdista den Latino America,” Koopman ta bisa. “Cu presidente izquierdista di Colombia e la busca pleito, pero cu lider derechista e ta amiga hopi facil. Incluso si nan pais ta un mega exportador di cocaina, manera Ecuador.”

E ministro di Asunto Externonan di Merca, Rubio, tambe tin un papel. Door di su origen Cubano, e semper a keda contra lider izquierdista den Latino America. Trump, pa su banda, ta un tipo diferente: e kier simplemente hasi negoshi.

CUA TA E INFLUENCIA DI PETROLEO?

Tin hopi petroleo cu ta sali for di Venezuela pa China, pero tambe pa Merca: 100.000 bari pa dia. “Ta un situacion contradictorio, pero Merca mester e petroleo ey, sino prijs na pomp lo subi,” Koopman ta bisa. “Chevron, e compania petrolero Mericano, tin interes grandi den Venezuela, y esey tambe tin influencia riba Trump.”