Pasashi for di Corsou ta aumenta otro aña debi na aumento di tarifa APIS

WILLEMSTAD – Pasaheronan cu ta sali for di aeropuerto di Corsou lo paga 2,79 dollar di tarifa APIS cuminsando prome di januari di aña 2026. E tarifa ta subi cu cinco cent y lo wordo cobra via e aeroliña den e prijs di e pasashi.

E sistema Advance Passenger Information System (APIS) ta un sistema pa control di frontera. Aerolineanan ta entrega e dato di pasaheronan na e autoridadnan di pais di destino prome cu buelo ta sali. E dato aki ta inclui nomber, fecha di nacemento y number di pasaporte, pa cu e autoridadnan por controla ken ta riba e buelo prome cu e aterisa.

E tarifa ta subi cu 5 cent na comparacion cu 2025, un aumento di 1,7 por ciento. E subida ta sigui e desaroyo di prijs di consumo familiar entre augustus 2024 y augustus 2025.

E-GATES

E ingreso adicional lo wordo uza pa amplia e cantidad di portanan automatico pa control di frontera (E-Gates) na aeropuerto. E ampliacion aki tin gasto pa compra, mantencion y adaptacion di sistema. E operador di aeropuerto ta entrega e fondo APIS na Corsou Airport Holding, sin impacto pa e presupuesto di pais.

KICO TA CAMBIA PA PASAHERONAN?

Pasaheronan cu a paga nan pasashi prome di 1 di januari pa buelo den e siguiente tres luna lo paga e tarifa bieuw. E tarifa nobo lo ta vigente tur e aña 2026. E pago por tambien wordo haci den florin caribense.