Dos cara hoben nobo den seleccion di futbol di Corsou

WILLEMSTAD – Ayer entrenador di e seleccion di futbol di Corsou, Dick Advocaat a presenta dos cara nobo riba e lista definitivo di e seleccion. Ta trata di Deveron Fonville y Jordi Paulina.

Pa loke ta trata di Fonville, ta un defensa pia robes cu por hunga tanto manera defensa banda como defensa central. For di september e defensa di 22 aña tabata riba lista di Advocaat, pero na e momento ey e no por a bini paso e tabata completando un traspaso di FC Dordrecht pa NEC Nijmegen. Mientrastanto den october e tabata regresando for di lesion.

Mientrastanto, Paulina ta bin reforsa e liña ofensivo di seleccion di Corsou. Ta un delantero di apenas 21 aña cu ta milita den Borussia Dortmund II (U-23 di Dortmund). Ta un hungador cu por hunga manera centro delantero, pero tambe por hunga riba banda. Aña pasa Jordi a haci su debut cu Borussia Dortmund.

Paulina tabatin un racha di tres wega sigui ta anota pa Borussia Dortmund II.

Dick Advocaat a bisa ku tanto Fonville como Paulina lo ta hungador cu tin balor awor y den futuro pa seleccion, mirando cu ta trata di dos hungador hoben y cu talento.