Retiro di docente di EPI a wordo anula: castigo a wordo considera demasiado severo

ORANJESTAD - E retiro di un docente di Colegio Educacion Profesional Intermedio (EPI) a wordo anula pa e tribunal mas halto pa asunto di empleado publico. Segun e Conseho di Apelacion, e medida disciplinario pa motibo di falta di cumplimiento di deber tabata desproporciona, apesar cu e docente a keda ausente dos luna sin permiso pa sigui un curso religioso na Florida.

DEMASIADO LEU

E docente a pidi dispensa di trabou den 2023 pa por sigui e curso aki, pero e peticion a wordo rechaza. Sinembargo, e a bai viaja toch. E minister di Educacion y Deporte a retira e docente aki den april 2024. Anteriormente, e tribunal ya a dicidi cu retiro den caso aki tabata un medida demasiado severo, y awor e Conseho a confirma e mesun desicion.

CASTIGO MAS SUAVE TABATA BASTA

Den e evaluacion a wordo tuma na cuenta cu e docente ta na servicio desde 2006 y tin un historial di trabou impecabel. No tabatin ningun incidente anterior ni dano intencional. Segun e Conseho, e minister tabata por basta cu un medida mas suave, manera un suspencion o un retiro condicional. Pasobra e retiro a wordo anula, su nombramento ta considera manera no a wordo interrumpi. Esaki ta duna derecho na e docente pa ricibi pago retroactivo di salario desde 8 di april 2024. Durante e sesion, e docente a bisa cu e no ke bolbe na su trabou; awor e ta maneha su propio negoshi y ta duna clas particular. E minister mester tuma e iniciativa pa yega na un terminacion di nombramento cu acuerdo mutual, incluyendo un acuerdo riba e pago di salario atrasa.