Lidernan politico Mike Eman y Evelyn Wever-Croes a felicita ganadornan di eleccion di Hulanda

ORANJESTAD – Lidernan politico di Aruba no a perde tempo diaranson y a manda felicita e ganadornan di e eleccion pa Tweede Kamer di Hulanda. Aunke anochi a cera cu solamente 20% di e votonan conta, e exitpoll a dicta caba ken ta bira e ganador y aki e dos ganadornan tabata D66 di Rob Jetten y CDA di Henry Bonteball. Tanto prome minister y lider di AVP Mike Eman y lider di partido MEP y di oposicion Evelyn Wever-Croes a manda nan felicitacion riba nan respectivo pagina di Facebook. 

MIKE EMAN 

E mensahe di Eman tabata dirigi na tur dos lider, y a bisa textualmente “Pabien di curason na e dos ganadonan di eleccion na Hulanda; amigonan di Aruba; D66 y CDA. Sabiduria y forsa na e lidernan Rob Jetten y Henri Bontenbal den formacion di un gobernacion nobo na Hulanda”, y acompaña pa e potret di nan tres, manera ta ilustra den e composicion di potret di noticiacla. 

EVELYN WEVER CROES

Evelyn Wever-Croes su mensahe tabata dirigi solamente na lider di partido D66, Rob Jetten y tabata na Hulandes. Mester menciona cu partido D66 ta partido ruman di partido MEP. E mensahe traduci na Papiamento tabata” Rob Jetten y D66, mi felisita bo cu e bunito resultado di awe! Bosnan a demostra cu politica cu vision, curashi y humanidad por sigui haci e diferensia.

Sigui construi riba un futuro husto, sostenibel y yena di speransa — Hulanda tin mester di lidernan manera bosnan. Cu aprecio y solidaridad for di Aruba, Evelyn Wever-Croes / MEP”. Y hunto tabata e potret ilustra den e composicion di potret di noticiacla.