Barco di guerra di Merca ta mara na Trinidad y Tobago,y pone mas presion riba Venezuela

PORT-OF-SPAIN, TRINIDAD Y TOBAGO – Un barco di guerra di Merca a mara diadomingo den capital di Trinidad y Tobago, na momento cu administracion Trump ta aumenta e presion militar riba pais bisiña Venezuela y su presidente Nicolas Maduro.

E yegada di e USS Gravely, un destructor di misil guia, den capital di e pais caribense, ta adicional na e portaavion USS Gerald R. Ford, cu ta moviendo mas cerca di Venezuela. Maduro a critica e movecion di e portaavion, yamando e paso un intento di gobierno mericano pa fabrica “un guerra eterno nobo” contra su pais. Presidente Donald Trump a acusa Maduro, sin presenta pruebanan, di ta lider di e banda di crimen organiza Tren di Aragua.

ENTRENAMENTO MILITAR CONHUNTO

Oficialnan di gobierno di e pais di dos islanan y di Merca a bisa cu e  barco di guerra lo keda den Trinidad te diahuebs pa cu dos paisnan por hasi entrenamiento conhunto. Un fuente militar superior den Trinidad y Tobago a bisa na Associated Press cu e movecion aki tabata programa recientemente. E fuente a papia bou di anonimato pasobra no tabatin autorizacion pa discuti e asunto publicamente. Kamla Persad-Bissessar, prome minister di Trinidad y Tobago, a expresa su apoyo abiertamente pa e presencia militar mericano y pa e atakenan mortal contra botonan sospechoso di droga den awa cerca di Venezuela. Jenifer Neidhart de Ortiz, e encargada di e embahada mericano, a bisa den un declaracion cu e entrenamentonan ta busca “combate menasanal comparti manera crimen transnacional y fortifica resiliencia via entrenamiento, misionnan humanitario y esfuerzo di seguridad.”

REACCION DI VENEZUELA

Diadumingo, gobierno di Venezuela a declara cu “e conducta peligroso di e ehercicio militar” den awa di un pais bisiña ta forma “un menaza serio” pa e region caribense y un “provocacion hostil” contra e nacion suramericano, segun un comunicado di su Ministerio di Asunto Exterior. E bishita di e barco ta bin un siman despues cu e embahada di Merca na Trinidad y Tobago a duna advertencia pa mericanonan pa no acerca su instalacionnan gubernamental. Autoridadnan local a bisa cu un amenaza reporta contra mericanonan a provoca e advertencia.

PROTESTA Y DIVISION

Hopi persona den Trinidad y Tobago a critica e presencia di e barco di guerra den su puerto. Durante un manifestacion recientemente dilanti di e embahada di Merca, David Abdulah, lider di partido politico Movement for Social Justice, a bisa cu Trinidad y Tobago no tabatin cu permiti e barco di guerra entra den su awa. “Esaki ta un barco di guerra na Trinidad, cu lo keda mara aki algun dia, solamente algun miya for di Venezuela, na un situacion caminda tin amenaza di guerra,” el a bisa. “Esaki ta un abominacion.”

REGION TA PIDI DIALOGO

Caricom, un bloque di comercio regional compone di 15 paisnan caribense, a pidi pa dialogo. Trinidad y Tobago ta miembro di e grupo, pero Persad-Bissessar a bisa cu e region no ta un zona di pas, señalando e cantidad di asesinato y crimen violento den area.