Trump ta manda e portaavion mas grandi di mundo pa Caribe

MIAMI  – Presidente Donald Trump a manda e portaavion mas grandi di mundo pa Laman Caribe dia diabierna, den un gran escalacion di su guerra contra droga. E USS Gerald R. Ford, un di un clase nobo di portaavion nuclear, ta wordo desplega for di Mediterraneo pa e awa na banda sur di Merca, hunto cu tres destroyer adicional. E movecion di un portaavion ta un paso militar significativo cu generalmente ta indica operacionnan mas grandi cu ta bini. Segun e Pentagon, e desplegamento ta parte di e meta di administracion pa “combate narco-terrorismo pa defende e Patria” y pa desmantela e cartel di droga.  “E presencia fortifica di forzanan di Merca den e area di USSOUTHCOM lo amplia capacidad di Merca pa detecta, monitorea y desrumpi actonan ilegal cu ta compromete e seguridad y prosperidad di e pais, y di nos seguridad den Hemisfero Occidental,” segun portavoz di Pentagon Sean Parnell den un post riba social media. “E forzanan aki lo amplia e capacidad existentenan pa desrumpi trafico di narcotico,” el a agrega. 

E aumento di forzanan a yega despues di un serie di atake adicional contra boto cu, segun administracion, tabata transporta droga. Tres boto a wordo ataca e siman aki, lo cu ta traha un total di 10 blanco destrui, ocho den Caribe y dos den Pacifico Oriental. Segun administracion di Trump, al menos 43 persona a muri den e atakenan. E buildup militar a lanta cuestion riba intencionnan di e presidente. Administracion di Trump ta bisa cu e ta trata di para e fluho di droga pa drenta Merca. Pero hopi ta mira e atakenan como un menasa pa e lider di Venezuela, Nicolas Maduro, cu ta enfrenta cargo criminal den Merca y tin un recompenza di 50 miyon dollar pa informacion cu ta guia pa su captura.  

Maduro, cu ta acusa di hiba e eleccion presidencial di aña pasa, a reaccioná cu su mes demostracion di forsa, mandando soldadonan pa e costa pa hasi ehersicionnan di defenza. Tambe ta wordo cuestiona e legalidad di e atakenan. Casa Blanco no a duna un respuesta directo pa kico e hende riba e boto ta wordo mata envez di captura y acusan pa trafico di droga. Dos sobrebibiente di un di e ultimo atake a wordo manda bèk pa Colombia y Ecuador, respectivamente, envez di enfrenta cargo penal. Presidente Trump ta afirma cu su guerra contra droga ta un cueston di seguridad nacional. “Bao Administracion Trump, nos finalmente ta trata e cartel como e amenaza principal pa seguridad nacional cu nan ta den realidad,” el a bisa dia diahuebs den Casa Blanco. “Nos meta ta elimin’é.”   “Nos lo mata e hende cu ta trece droga na nos pais. Nos lo mata nan. Nan lo ta, manera, morto.”  

E ritmo di atakenan mericano a subi, y tambe nan extension. E siman pasa, e operacion a amplia for di Caribe te den Oceano Pacifico.  Presidente Trump a indica cu un operacion terestre lo ta e proximo paso.  “E tera lo ta e proximo,” el a bisa dia diahuebs sin duna un locacion especifico. “Bo lo mira esaki pronto.”  Cualquier operacion terestre lo probabelmente ta un atake misil, y no soldadonan mericano riba tera.  The Wall Street Journal a raportahe cu Forza Aerea di Merca a bula dos B-1 bombers serca di costa di Venezuela, pero avionnan a keda den espacio aereo internashonal. E bombarderonan por wordo usa pa destrui instalacionnan di produccion y distribucion di narcotico. Trump a nega cu e buelo a tuma lugar ora el a wordo puntra tocante esey.  “Mi no lo ta sorprendi si nos no mira un operacion terestre limita enfoca riba Maduro promé cu e prome siman di november ta caba,” a bisa profesor Evan Ellis di U.S. Army War College Strategic Studies Institute. “Pero mi no ta spera un operacion mericano grandi contra Maduro te na fin di november o cuminzamento di december,” a agrega Ellis, un ex-funcionario di Departamento di Estado cu a traha den e region.  E Ford y e otro barconan di e grupo di portaavion lo tuma algun dia pa yega for di Laman Mediterraneo te Caribe. Nan lo uni cu 4,500 personal di Merca – Marine y Navy – un cruiser, algun destroyer y un submarino di clase Los Angeles cu ya ta den region. Te awor no ta cla kiko tabata riba e boto cu a wordo ataca. Pentagon no a duna prueba definitivo cu tabatin droga riba nan. Tambe no ta cla cuantu droga e presidente realmente ta logra para di drenta Merca. E mayoridad di droga ta drenta pa tera, atraves di frontera cu Mexico, despues cu e ta yega via Oceano Pacifico. Trafico di droga den Caribe generalmente ta termina na Europa.