Yiu di Corsou Ceddanne Rafaela ta gana e Fielding Bible Award pa prome biaha

BOSTON – Ayera a anuncia e diferente ganadornan di e Fielding Bible Award, cu ta e premio pa e mihor hungador defensivo na kada posicion den Liga Grandi. E yiu di Corsou, Ceddanne Rafaela, a gana e Fielding Bible Award como e mihor centerfielder defensivo den Liga Grandi. Esaki ta e prome Fielding Bible Award den e carrera di Ceddanne Rafaela. E a bira tambe e di tres yiu di Corsou pa gana e premio aki. Andruw Jones a gana un Fielding Bible Award, mientras Andrelton Simmons a gana seis. Den historia di e premio, Simmons ta e di dos hungador cu mas biaha a gana e Fielding Bible Award. Solamente Mookie Betts, cu ayera a gana su di shete, tin mas cu e shortstop yiu di Corsou.  

Ceddanne, manera ta conoci, a tin un temporada defensivo tremendo como e centerfielder principal di Boston Red Sox. E pelotero yiu di Corsou a keda na cabes di tur e centerfieldernan di Liga Grandi cu 20 Defensive Runs Saved (DRS), y tambe a keda empata na e prome puesto cu un Defensive Wins Above Replacement (Defensive WAR) di 2.9.  

E Fielding Bible Award ta wordo otorga te na su 20 aniversario aki. Un panel di experto den e mundo di beisbol di Liga Grandi ta scohe e ganadornan di e prestigioso premio defensivo, usando statistieknan analitico, conocemento di e habilidad defensivo di e hungador y otro factor cu ta yuda determina e mihor.  Awor falta pa Ceddanne Rafaela gana e Guante di Oro, pa completa un temporada defensivo realmente tremendo cu dos premio importante.