Alvin Molina: Di parlamentario bek pa hoofdinspector di polis

ORANJESTAD  – Hoofdinspecteur Alvin Molina ta bolbe na Cuerpo Policial di Aruba y lo tuma cargo temporario como interim-hefe di e departamento di investigacion riba 21 di december. E ta tuma e funcion aki di inspector Humphrey Koolman.   Molina ta traha hopi siman awor hunto cu Koolman pa prepara pa su nobo rol. E ta familiarisa su mes cu e trabounan, conocemento y e manera cu e departamento di investigacion ta funciona. 

E cuerpo di polis a expresa un gran agradicimento na Koolman pa su dedicacion y contribucion balioso, tanto na e departamento di investigacion como den tur e organizacion durante hopi aña.  

Alto comisario Ramon Arnhem a expresa su contento cu e bolbemento di Molina. “Cu Molina nos ta ricibi bek un funcionario di polis cu hopi experiencia y un lider. E ta un gran ganamento pa nos Korps Management Team. E ta trece no solamente conocemento y experiencia, sino tambe un red amplio di contacto. Mi tin hopi confianza den un colaboracion exitoso y efectivo,” segun Arnhem.