Wardacosta awe mainta a rescata tres tripulante

WILLEMSTAD  – Den ora di diaranson mainta di 22 di oktober, Centro Maritimo Operacional di Wardacosta (MOC) a ricibi un yamada relacona cu un boto cu un number di registracion local (NC), cu no a regresa Corsou e mainta ey.  E boto a sali for di Corsou riba diamars 21 di oktober, pero no a regresa. Segun e informacion cu a ricibi, tabata spera tin dos persona riba e boto, cu posibilidad cu tin un tres persona abordo.  Apenas a ricibi e yamada, inmediatamente a manda un helicopter pa bai busca, hunto cu un avion tipo Dash. Alabes, a manda patruyanan riba tera pa yuda busca banda di costa. Na un dado momento e helicopter a regresa na su base na Hato, pero e avion a sigui busca te despues cu solo a baha.  

Awe diahuebs 23 di oktober, a sigui cu e buskeda ora solo a sali. Na un cierto momento den ora di mainta, e avion a logra localisa un boto cu tres persona abordo, na zuidwest di Corsou. E tres persona nan tabata zwaai nan man den laira duna señal cu nan ta bon. Inmediatamente a manda e helicopter di Wardacosta hunto cu un unidad di Metal Shark pa rescata e personanan. E helicopter a yega promé na e posishon di e boto y a warda te ora cu e Metal Shark a yega. Personal di Wardacosta riba e Metal Shark a rescata y hiba e tres tripulante (y nan boto) na base di Wardacosta na Parera.