Carnival Valor lo drenta na servicio regular for di haf di Mobile na 2027 y bishita Aruba

MIAMI – Aruba ta bira parti di e itinerario nobo di e barco crucero Carnival Valor na 2027. Desde 15 di mei 2027, e barco Carnival Valor, e prome barco di clase Conquest cu lo sali for di haf di Mobile, lo ofrece biahan di seis te ocho dia. E cruceronan lo bishita e destinacionnan priva di Carnival na Bahamas: RelaxAway, Half Moon Cay, y Celebration Key.  

“Mobile a keda un parti importante den e famia di Carnival, y nos ta hopi felis pa anuncia e regreso di operacionnan durante tur e aña cu nos prome barco di clase Conquest na e mercado aki,” a bisa Christine Duffy, presidente di Carnival Cruise Line. “Esaki ta un gran logro pa nos huespedenan cu ta gusta e comodidad di viaha serca di cas, y tambe pa e comunidad cu a brinda nos sosten durante hopi aña.  

Carnival Valor lo ofrece dos biaha special di 14 dia bou di e programa Carnival Journeys como parti di su despliegue for di Mobile. 

- Riba 26 di september 2027, e barco lo sali pa un itinerario di 14 dia pa Caribe y Panama, cu parada na Ocho Rios, Cartagena, Colon, Limon, Cozumel, Aruba, y Corsou.  

- Riba 16 di januari 2028, e barco lo ofrece un biaha di Caribe Sur di 14 dia, cu bishita na San Juan, Montego Bay, Amber Cove, St. Thomas, Aruba, Corsou, y Celebration Key.  

E barco tambe lo tene un biaha special di siete dia di Thanksgiving, riba 20 di november 2027, cu lo bishita Key West (Florida), asina mes cu Nassau y Celebration Key.  

E barco Carnival Spirit lo keda na Mobile te april 2027, ora cu Carnival Valor ta yega na haf. Prome di su llegada na Mobile, Carnival Valor lo completa su despliegue den New Orleans te 10 di mei 2027.