Merca ta amplia atake contra ‘contrabandistanan di droga’ te na Laman Pacifico

WASHINGTON - E ehercito di Merca a destrui dos boto riba laman Pacifico den costa di Colombia dia diamars y diahuebs, cu segun nan tabata usa pa contrabando di droga. E cinco persona abordo a perde nan bida.  Ta e prome biaha cu transporte sospechoso di droga den Laman Pacifico a wordo ataka. Den operacionnan anterior, tabata semper den Laman Caribe, cerca di Venezuela. “E embarcacion tabata conoci pa nos como un barco cu tabata usa pa contrabando di droga. E tabata sigui un ruta di contrabando y tabata tin droga abordo,” ta bisa minister di Defensa  Hegseth  tocante e barco cu a wordo ataka dia diamars. Prueba directo cu e tabata referi na contrabando di droga, e no a mustra. Pero e a presenta dos video caminda por mira boto cu ta move na grandi velocidad riba e awa y despues ta explota di repente.