Fazio: No ta promove personanan internamente pa bira CEO di nos aeropuerto

ORANJESTAD – Royal Schiphol Group (RSG) no ta promove hendenan internamente di e compania pa bira CEO. E contesta aki e siman aki di e CEO interino di aeropuerto James Fazio, a clarifica e 'misterio' di hopi aña: Pakico ainda no a pone un hende local na cabez di aeropeurto. Pa basta aña, tabatin e pensamento den comunidad y sigur den esun di aviacion, pakico e compania cu tabata maneha nos aeropuerto e ultimo 14 plus aña, esta Royal Schiphol Group, no a ‘cumpli’ cu e contract cu gobierno, cu ta specifica cu nan (RSC:red) mester prepara un hende local pa asumi e funcion di CEO na e aeropuerto. Un nomber cu constantemente tabata bin dilanti, tabata p.e.  Jurgen Benschop, cu tin mas di 20 aña trahando na aeropuerto y hopi di e añanan ey den funcion di liderazgo. Algo cu nunca a materialisa. Y ora cu e ultimo aña e la dirigi aeropuerto hunbto cu dos persona mas, a pensa cu awor e momento ta bin. Pero e siman aki, e contesta a bin porfin. “Royal Schiphol Group no ta promove trahadonan internamente for di e compania, pa bira CEO di e compania”. Por lo menos asina e actual CEO interino di nos aeropuerto Reina Beatrix, James Fazio a confesa durante e programa Noticiacla LIVE diamars anochi. Pues, e echo cu Royal Schiphol Group no a entrena y presenta un candidato local pa bira CEO di nos aeropuerto, ta entre otro esey. Y pesey, e ora awor por compronde cu ni Benschop, ni cualkier otro local trahando na nos aeropuerto localmente, lo por bira CEO, segun RSG. 

SEMPER TA BUSCA UN CANDIDATO DI AFO E COMPANIA

E politica di e compania RSG, ta cu semper ta busca un persona superior ‘di afo’, cu ta bin cu ideanan nobo, un experiencia di afo, envez di simplemente promove un persona sin mas. Y segun Fazio, no solamente den RSG, pero tur aeropuerto internacional ta opera asina. Trece hende di afor, cu un bista fresco, cu experiencia Amplio di otro caminda, pa haci e trabou. 

OFERTA PA TRAIN

Asina mes, segun Fazio su declaracion, tabatin e oportunidad pa entrena un persona for di paden, door di mande afo pa algun aña (ta menciona entre 10 pa 15 aña por lo menos), y despues di a adkeri tur e experiencia ey, bin bek y e ora si por tabatin un oportunidad pa e funcion ey. Pakico ningun persona no a wordo manda afo, no ta conoci, pero a compronde cu ningun persona e tempo ey tabatin sea e interes of kier a tuma e chens ey. E ta un oportunidad, cu tin consecuencia personal si, esta bandona bo pais pa varios aña. Y noticiacla por a compronde cu porta esey tabata un sacrificio cu porta ningun hende kier a haci e momento ey. 

 GOBIERNO POR A APUNTA UN HENDE PERO NO A HACIE

Fazio a mustra tambe cu ta parce cu localmente na nivel di e hunta di supervision, tambe tabatin e pensamento ey, esta  cu no tabatin hende capacita pa haci e trabou ey localmente. Esaki pasobra, pa e ultimo aña, no tabatin hende na cabez di Triple A for di Schiphol Group. “Y durante e periodo ey, un CEO local por a wordo apunta. Tabatin un grupo gerencial temporalmente na lugar. Nan por a apunta un persona na cabez. Pero esey no a sosode tampoco! Pues no ta solamente nos” Fazio a bisa, indicando cu no ta solamente RSC no a mira un candidato potencial, sino localmente tampoco a mira esaki. Segun Fazio, tabatin tur e posibilidad durante e periodo ey, pa haci e cambio, pero e cambio no a bin. 

CONTRACT TA CONTRACT

Ora cu Noticiacla a puntra Fazio cu si no ta esey ta netamente parti di e contracto, cu ta obliga RSG di train y prepara un hende, e la bisa, cu si esey ta e idioma den e contract, ‘ esey ta inalcansabel pa nos!”.  Bisando esey, Fazio a admiti cu e espirito di e contracto tabata cu lo a inverti tempo den hende local y prepara nan. Pero atrobe, manera a bisa anteriormente, prepara den sentido cu ta manda nan afo, pa train y bin bek cu cantidad di experiencia internacional adkeri. “E ta un paso grandi pa hende, y tin biaha nan ta bisa cu nan no ta dispuesto pa haci e sacrificio ey”, Fazio a sigui bisa. Fazio mes ta den e funcion di CEO temporalmente, te fin di aña, pendiente pa RSG busca y recluta un otro persona como CEO, cu mester asumi e rol na comienso di otro aña. Esey, si Aruba logra keda cla cu e cambio di ley di LNT (Landsverordening Normering Topinkomens Aruba), unda cu e ley aki no ta conta pa CEO di aeropuerto y tampoco e otro funcionan gerencial. Pasobra manera cu Fazio a confirma tambe den un otro articulo di e portal aki, si e ley keda manera cu e ta, RSG no por haya y no lo presenta un candidato pa CEO, pasobra ningun hende lo traha pa e suma cu LNT ta stipula. E suma ta simplemente inatractivo pa busca hende di afo.