Aeropuerto di Corsou a presenta: Beca na nomber di Margareth Abraham

WILLEMSTAD  – Na ocasion di e estreno di documental *Un Homenaje na Margareth Abraham*, dilanti di famia, amigonan, invitadonan y sponsor presente, a anuncia un beca “The Margareth Abraham Scholarship”, cu su detaye lo wordo publica den prome cuartal di 2026.  

Corsou Airport Partners hunto cu e otro sponsor CAH, DC-ANSP y OX & WOLF a haci posibel pa e documental *Un Homenaje na Margareth Abraham* bira realidad. E estreno a tuma luga ayera anochi den The Movies Corsou na Otrobanda. E documental ta dirigi pa e yu di Corsou Selwyn de Wind y ta conta e historia di e tragedia y di bida di Margareth Abraham, cu su heroismo ta sigui inspira un y tur despues di mas cu 50 aña.  

Margareth Abraham tabata un di e stewardessnan riba vuelo ALM 980, cu a sali for di JFK Internacional Airport na New York rumbo pa St. Maarten dia 2 di mei 1970. Den cierto momentu e avion a haya problema y a mester hasi aterisahe den laman, manera nan ta yama *ditch*, den e area na costa di St. Croix. E stewardess Margareth a yuda pasaheronan pa salba nan bida y sigur a pone nan prome cu dje mes. Na un edad di solamente 24 aña, e a haci e sacrificio maximo — un acto real di balentia y compasion cu a marca su nomber pa semper den nos curason.  

E documental a bira posibel danki na Corsou Airport Partners (CAP), cu sosten valioso di Corsou Airport Holding (CAH), Dutch Caribbean Air Navigation Service Provider (DC-ANSP), y OX & WOLF. E estreno a logra uni un audiencia emocional, cu famia y amigonan, actor y colaboradornan, y invitadonan distingui manera Minister di Desaroyo Ekonomico, señor Roderick Middelhof, y Gobernador interino di Corsou, su ekselensia Michele Russel-Capriles.  

E estreno di ayera tabata hopi emocional; riba pantaya por a mira entrevista y detayenan cu nunca prome a wordo publica, entre otro di su famia, amigonan y sigur di su ex-prometido Robby Schouten, cu ken e tabata apunto di casa.  

E sorpresa grandi di anochi a yega na final di e ceremonia ora CAP a anuncia *The Margareth Abraham Scholarship*, un beca anual pa honra su legado, sostené y inspira e proximo generacion. Mas detayenan di e beca lo wordo publica den prome cuartal di 2026.  

Tambe a anuncia cu e comunidad completo lo por experencia e historia emoshonal aki. *E Documental – Un Homenaje pa Margareth Abraham* lo ta eksibi for di awe 21 di oktober na The Movies Corsou, den Punda y Otrobanda, y durante e Krioyo Film Festival na Caribbean Cinemas, Sambil, for di 27 di oktober te 5 di november 2025.