Otro atake nobo di Merca riba un boto den Caribe, ‘posiblemente tin sobrebibientenan’

WASHINGTON - Merca supuestamente a tene un otro atake riba un boto den area Caribe. Asina e portal di noticia Reuters ta informa. Un funcionario mericano a bisa na agencia di noticia Reuters cu pa prome biaha tin sobrebibientenan entre e tripulacion. E gobernacion mericano no a confirma e atake. E fuente anonimo no a bisa con mucho hende ta ni si e ehercito mericano a duna ayudo na e sobrebibientenan. Tampoco ta conoci si e hende aki a wordo detene pa e mericanonan. For di september, e gobernacion mericano ta tene atake riba barconan den area Caribe. Nan ta afirma cu e barconan ta yena cu droga cu ta sali for di Venezuela pa drenta na Merca. E Pentagono ta referi na esey como atake riba “narcoterroristanan”. Pero no tin prueba independientemente cu e barconan ta realmente barko di droga. Almenos 27 persona a muri for di september.

OPERACIONNAN SECRETO DI CIA

Presidente mericano Trump a bisa e siman aki cu el a duna permiso na e agencia di inteligencia CIA pa tene operacionnan secreto den Venezuela. Segun expertonan, Trump probablemente kier kita e presidente venezolano Maduro for di poder. Nan tambe ta pone duda si e atake ta legalmente hustifica. Venezuela a condena e atake y ta yama esey un “serie di ejecucionnan fuera di ley”. E pais a manda un carta na e Conseho di Seguridad di Naciones Unidas. Den e carta ey, Venezuela ta pidi Conseho di Seguridad pa yama e atake riba costa di Venezuela ilegal y pa defende e soberania di e pais. Tambe Venezuela ta pidi cu tin un investigacion riba e atake mericano.