Colaboracion entre Instituto di Derecho Humano y Corte di Husticia di 6 islanan di Reino Hulandes

ORANJESTAD - Entrante januari 2026, Instituto pa Derechonan Humano lo haci uso di e facilidadnan di Corte Comun di Husticia di Aruba, Corsou, Sint Maarten, Boneiru, Sint Eustatius y Saba. Awe, Rick Lawson, presidente di e Instituto, y Mauritsz J. de Kort, presidente di e Corte Comun, a firma un contrato pa formalisa esaki.  E Instituto lo usa e localidad pa husga kasonan di discriminacion riba e islanan Boneiru, Sint Eustatius y Saba.  

LEY DI TRATO IGUAL PA HULANDA CARIBE

Dia 7 di october 2025, Eerste Kamer a aproba e implementacion di e Ley di Proteccion contra Discriminacion pa Boneiru, Sint Eustatius y Saba.  E implementacion aki ta inclui cu for di januari 2026, habitantenan di e islanan lo por haci un apelacion riba e ley si nan ta sinti cu nan a wordo discrimina.  Den e cuadro aki lo tin un mesa di ayudo huridico gratis y un servicio contra discriminacion (antidiscriminatievoorziening – ADV).  Adicionalmente, habitantenan lo por entrega un keho di discriminacion independiente na e Instituto. Habitantenan lo tin e opcion pa pidi un juicio di discriminacion cerca di e Instituto of opta pa mediacion. 

PRESENCIA FISICO DI INSTITUTO RIBA E ISLANAN

Pa ehecuta su mandato nobo, e Instituto lo haci uso di e facilidadnan di Corte Comun di Husticia di Boneiru, Sint Eustatius y Saba pa seshonnan di huicio. Esaki ta brinda e posibilidad pa casonan por ta trata personalmente. E colaboracion ta un paso importante pa garantisa derecho y solucion igual contra discriminacion na Hulanda Caribe, mescos cu loke ta posibel caba na Hulanda Europeo.