Comienso di 2026 ta dicidi si ex Codemsa ta bira centro nobo di polis

ORANJESTAD – Un arkitecto independiente ta haciendo un analisis independiente riba e Proyecto di polis pa ex Codemsa aworaki. Asina minister di husticia Arthur Dowers a bisa Noticiacla e siman aki. “Basa riba esey, lo tuma un decision” Dowers a bisa, indicando asina cu e decision final no a cay ainda si e edificio ta bira e centro nobo di polis na Aruba. E mandatario tambe a clarifica cu aworaki no tin un proyecto, sino un project dossier scirbi door di Algemeen Pensioen Fonds Aruba (APFA), cu ta doño di e edificio, y cu ta bisa cu lo ‘por’ ofrece un servicio pa cierto suma, ‘e tempo aya’. Pues ora cu e gobierno anterior a presenta e plannan aki, segun e mandatario. “Inmiddels esey no ta e caso mas pasobra e prijs nan (pa ehecuta e proyecto:red) a subi drasticamente, kier men cu no tin un project dossier riba e realidad”. Dowers a bisa.

KICO MESTER SALI AFO

E analisis di e arkitecto mester mustra si e plan original ta viable, basa riba e espacio cu mester, y loke kier pone den e edificio. Tin indicacion cu varios espacio no tabata apto of viable, manera magazijn mucho grandi, siendo cu no tabata necesario y no ta bal e balor ey. Tambe por tin mas facilidad den e edificio cu ‘no ta make sense’ pa hustifica paga basta placa p’e. 

TEMPO

E minister a bisa cu pa comienso di otro aña mester tin claridad si e proyecto aki ta bay door si of no.

FOR DI 2022

E proyecto ta den tapara for di 2022 cu e minister anterior di husticia Rocco Tjon. Na varios instante a duna update y cerca Noticiacla mes a bisa un tempo cu pa 2024, esta aña pasa, e centro nobo aki lo mester tabata operacional. Algo cu logicamente no a pasa. Tabatin discussion publico cu e minister actual no a haya documentonan di e proyecto, y e ex minister tabata bisa cu si tabatin documento y tabatin por lo menos 5 persona cu tabatin conocemento di esaki. E actual minister a reacciona cu esey no tabata e caso, pero cu si a haya cierto documentonan finalmente, pero no acaba.