Na Hulanda, Geert Wilders ta activo den campaña electoral atrobe y ta participando den debatenan

DEN HAAG - Geert Wilders (PVV) ta bira activo den campaña electoral atrobe. E la anuncia esaki despues di un siman di ausencia, den un mensahe largo riba X. Desde diaranson pasa e no tabata participando mas, pasobra e no tabata sinti sigur. E lider di PVV a para su campaña despues cu e a tende cu e por a ta un blanco di un cel di terror belga, cu un dia prome a ser desmantela. Cinco dia despues e la bisa riba X cu e “den e luna aki tin exactamente 21 aña” cu ta bao di seguridad y cu e no ta biba mas den su cas, sino den un cas di seguridad. “Despues di tur e añanan aki, mi no ta conoce mas e sintimento di libertad personal. E impacto cu tur esaki tin riba bo mes y bo famia ta hopi biaha dificil pa bisa na hende cu no a pasa e mesun situacion.” Pero durante temporada di campaña, e ta sinti “un gran responsabilidad pa Hulanda y pa tur votadornan di PVV,” e a bisa, y pesey e lo   participanta den actividadnan di eleccion atrobe.

Wilders a cancela e debate di NOS Radio riba e ultimo momento y tambe no a  presenta den e debate di RTL di diadumingo pasa, a pesar cu tabata propone pa haya un luga cu seguridad adicional. Otro  partidonan a expresa nan simpatia pa Wilders, pero tambe a bisa cu tabata lamentabel cu nan no por a debati cu e partido mas grandi.

Lider di VVD Dilan Yesilgoz a bisa diadomingo den RTL: “Mi ke gradici bo y bo redaccion pa tur e esfuezonan cu boso a haci hunto cu polis y NCTV pa mira si tabatin un manera pa logra e debate.” NCTV ta e Coordinador Nacional pa Combate di Terrorismo y Seguridad.

Diaranson, Wilders lo ta presente den programa Vandaag Inside, y e lo participa tambe den e tradicional emision pa lidernan di partido di NOS Jeugdjournaal dia 26 di october, y den e debati final di NOS dia 28 di october.