Na Corsou, minister Silvania lo a limpia oficina y a bay RST diamars

WILLEMSTAD .– E situacion ta bira mas y mas tenso rond e grabacion cu a sali rond entre minister Silvania y Ontvanger Alfonso Trona. Diamars EXTRA a publica cu parce cu e coalicion lo a cuminza acerca oposicion den caso cu mester sosten pa sigui gobierna bou di e gabinete aktual. Esaki teniendo na cuenta cu no tur e miembronan den MFK ta riba e mesun liña.  Sigur no riba e liña cu mester baha Silvania como minister. Mayoria ta kier cu loke e a bisa no tabata mag, pero no ta asina grave pa baha e como minister. Diamars nos a compronde cu Silvania a limpia su oficina — esta, e a hiba varios cos — y diamars mainta e lo a bay RST. EXTRA no tin informacion si kizas ta documentonan e la bay cune pa RST of si ta e mes e a bay for di su oficina. Normalmente e bishitanan na RST ta sosode riba invitacion y no ta boluntariamente. Manera minister Silvania a bisa den e grabacion, e a acusa Trona di corrupcion, mientras cu Trona a bisa cu e tin den su lachinan pruebanan scirbi na pen cora.

Envolvimento di RST no ta pa casonan chikito; nan envolvimento ta den entre otro trafico di droga y arma, trafico y contrabanda di hende, labamento di placa, corrupcion y fraude, criminalidad digital, criminalidad internacional organiza. RST ta traha den colaboracion cerca cu Ministerio Publico, polis, mareschaussee y tambe hasta cu polis nacional di Hulanda, FIOD y Duana. Varios di e puntonan menciona ariba ta directamente loke e caso aki ta trata, es decir fraude den asuntonan di impuesto/duana. Te ainda niun hende a bisa nada. Prome minister Pisas no kier puntra e mes riba e caso aki. MFK a saca un comunicado cu ta bisa cu disciplina y respet mester ta central y nan a bin implementa e balornan aki den un forma rigido. MFK ta bisa cu ta tratando e incidente Silvania/Trona di forma serio y cu e diskresion nesesario. Nan a priminti for di siman pasa pa tuma un posicion y comunica cu pueblo; sinembargo te awor, dos siman despues cu e grabacion a lek, MFK no a duna mas declaracion.

Te ainda tur loke ta wordo publica ta abase di loke nos ta tende of di fuentenan cu a yega na e doñonan di curpa. Pero di e fuentenan oficial mes — MFK, Silvania y Ministerio Publico — ta un silencio total.