Aeropuertonan di Merca cu retraso debi na 'shutdown'

WASHINGTON AFP – E agencia di control aereo di Merca a informa di e problemanan di personal den casi un docena di aeropuerto, esaki debi na e 'shutdown' gubernamental cu a laga cantidad di miles di funcionario federal sin salario. E monitor di aviacion FlightAware a informa cu alrededor di 10 mil buelo tabatin retraso dialuna y diaranson. Aunke no ta considera cu esaki ta un cantidad inusualmente halto, e agencia federal di aviacion FAA a adverti cu e problemanan por bira peor. Secretario di transporte, Sean Duffy, a bisa na periodistanan den aeropuerto di Newark, cerca di New York, cu tabatin un aumento leve den e nivel nacional di controladornan di trafico aereo cu tabata yama pa bisa cu nan ta AO. "Mi no kier pa e buelonan retrasa. Mi no kier pa nan cancela, pero nos prioridad ta seguridad," asina el a indica. "Y si nos haya mas yamada di AO, nos lo reduci e fluho di trafico di acuerdo cu un indice cu ta sigur pa e pueblo mericano." E democratnan a vota pa e di seis biaha diaranson contra di un proposicion di ley di e republicanonan pa prolonga presupuestonan. Controladornan di trafico aereo ta considera como empleadonan publico esencial y nan ta sigui traha durante 'shutdown' di gobierno, aunke sin sueldo. Un memorandum preliminar di Cas Blanco e siman aki a bisa cu e trahadornan suspende no tin garantia di compensacion pa nan tempu liber, loke ta nifica cu hopi por perde nan pago retroactivo.