Cierre parcial di gobierno Mericano ta costa industria di biahe mas cu 765 miyon dollar

WASHINGTON - E cierre parcial di gobierno Mericano, cu a drenta na vigor desde 1 di october, ta cuminza tin gran consecuencia pa e sector di biahe y aviacion. Segun US Travel Association, e daño durante e prome dia nan ya ta yega rond 765 miyon dollar (segun dato di dialuna mainta 11.30), y si e situacion ta dura mas largo, por subi te 1 biyon dollar pa siman. E organizacion ta sigui registra e daño den tempu real.

E shutdown ta consecuencia di falta di un acuerdo riba e presupuesto den Congreso Mericano. Aunke servicio esencialnan ta sigui funcionando, pasaheronan ta sinti ya e prome efecto.

AVIACION TA SIGUI, PERO TEMPO DI ESPERA TA AUMENTA

Biahe comercialnan ta sigui normal, y tanto Transportation Security Administration (TSA) como control di trafico aereo ta keda activo. Sinembargo, nan personal ta trahando temporalmente sin paga, loke na un cierto momento por causa atraso. Durante e shutdown anterior di 2018-2019, esaki a causa gran falta di personal y atraso na aeropuerto nan manera LaGuardia na New York. Pasaheronan ta wordo recomenda pa planifica mas tempo pa e control di seguridad.

TREIN, PASPOORT Y PARKE

Amtrak ta informa cu e trafico di tren den e Merca y pa Canada ta sigui normal te awor. Tambe entrega di paspoort y visa ta sigui, aunque e proceso por tuma mas tempo.