Hamas ta reacciona riba plan di Trump pa Gaza: ‘Disponibel pa negocia inmediato’

WASHINGTON - Hamas a reacciona riba e plan pa Gaza di presidente Trump. E movimiento terrorista ta bisa den un declaracion cu e ta disponibel pa libera tur rehennan israeliano, manera ta stipula den e plan. Ademas Hamas ta bisa cu e kier negocia directo “riba e detalle di e acuerdo aki”.

Den e declaracion, Hamas no ta pronuncia riba algun punto crucial for di e plan, manera entrega di arma. Un miembro haltu di Hamas, Mousa Abu Marzouk, a bisa na canal di noticia Al Jazeera cu e movimiento no lo entrega arma “prome cu e ocupacion israeliano a caba”. E tambe a bisa cu Hamas “lo participa y contribui den forma responsable” na negociacionnan.

Pero tanto fuente israeliano como mericano a bisa cabando cu no tin negociacion posibel riba e plan di Trump pa Gaza. “Un contesta di Hamas mester ta un ‘si’ simpel of ‘no’”, segun un fuente israeliano a bisa na The Jerusalem Post, y dos fuente mericano na i24 News.

Cas Blanco ainda no a reacciona riba e declaracion di Hamas.