Hulanda ke pone proposicion anterior pa areglo di disputa bek riba mesa

WILLEMSTAD / DEN HAAG – Gobierno hulandes ta di opinion cu e proposicion anterior pa un areglo di disputa den Reino ta e mihó solucion. Nan a trece esaki dilanti den nan reaccion (“position paper”) riba e conseho di Raad van State di 2024 relacional cu 70 aña di Statuto. E posicion aki di gobierno hulandes ta sali mescos na e mesun momentu cu Aruba, despues di consulta cu Corsou y St. Maarten, a entrega un proposicion di ley nobo pa un areglo di disputa.

Un di e puntunan cu Raad van State a pone enfasis riba dje den nan conseho ta un areglo di disputa pa Reino, caminda ta mustra cu for di 2010 articulo 12a di Statuto di Reino tin e tarea pa yega na un ley di Reino pa atende cu disputanan. Raad van State ta conseha pa yega na un areglo di disputa general caminda un instancia independiente manera Raad van State ta duna un conseho obligatorio (“bindend”) pa disputanan huridico, y pa aspectonan di maneho ta duna un conseho cu gobierno di Reino por desvia for di dje solamente si tin motibo hopi severo (“zwaarwegende gronden”).

Gobierno di Hulanda su punto di bista ta, sin embargo, cu e solucionnan cu Raad van State ta presenta ta trece otro problema hunto. Pa haci un diferenciacion den practica entre disputa riba puntonan huridico y puntonan di maneho ta dificil, pasobra maneho y aspectonan huridico hopi biaha ta mara hunto.

Pa e motibo aki gobierno hulandes ta di opinion cu lo ta un problema, tanto pa e organo cu ta duna conseho como pa gobernacion, pa separa kico ta obligatorio y kico no. Mas aleu gobierno hulandes ta di opinion cu no ta logico cu un colegio semi-hudicial ta e instancia pa atende cu disputanan di caracter mixto (huridico y gobernacional/politico), mientras cu na nivel di gobernacion mester tuma un desicion final semper. E ta referi mas na disputanan cu ta den dominio politico y di gobernacion.

Ademas, gobierno hulandes ta indica cu Raad van State den su proposicion no a pone restriccion pa e tipo di topiconan cu e instancia di disputa por trata. Den e proposicion anterior, cu despues a wordo retira, tabata identifika diferente topico cu ta exclui for di e proceso di disputa, y asina duna posibilidat pa exclui caso di urgencia. Gobierno hulandes ta bisa cu ta importante pa no perde esaki den e proposicion di Raad van State.

Den e cuadro aki, gobierno hulandes ta di opinion cu e proposicion di ley di Reino anterior ta e mas factibel. Pa e motibo aki, Hulanda ta dispuesto tambe pa bolbe trece e proposicion aki dilanti, si esaki ta deseabel. Corsou, Aruba y St. Maarten a protesta fuerte kontra e proposicion anterior aki, motibo pa cual gobierno hulandes a retira dje tambe.