Corsou, Aruba, Sint Maarten y Hulanda ta traha hunto pa proteha derecho di estado y bon gobernacion

ORANJESTAD - Tur pais den Reino ta reconoce importancia di colaboracion pa fortifica estado di derecho y bon gobernacion. Pa esey Aruba, Corsou, Hulanda y Sint Maarten ta traha hunto pa combati crimen di ‘ondermijning’, corrupcion y fraude y pa promove integridad. Asina Secretario di Estado di Husticia y Seguridad Foort van Oosten y Secretario di Estado Eddie van Marum a splica Tweede Kamer ayera. Motibo di esaki ta un mocion di Kamer cu ta pidi un asercamiento mas fuerte contra fraude, crimen di ‘ondermijning’ y corrupcion.

ATENDEMENTO CU ‘ONDERMIJNING’

‘Ondermijning’ ta un tipo di criminalidad organiza den cua e esferanan legal y ilegal, comunidat decente y mundo criminal ta mescla cu otro. E posicion geografico den cercania di Latino America y Norte America y e ruta comercial pa Europa ta haci e parti caribeense di Reino extra vulnerabel pa crimen di ‘ondermijning’, manera contrabando di droga y arma y trafico ilegal y contrabando di hende. Tambe e escala chikito di e islanan ta representa un riesgo mas grandi pa conflicto di interes no intenciona.

Criminalidad cu ta crusa frontera y crimen di ‘ondermijning’, combati corrupcion y fraude y promocion di integridad ta asunto autonomo di Aruba, Corsou y Sint Maarten. E paisnan tin di habri nan mes pa vulnerabilidad extra, debi na capacidad limita na personal y recurso. Pa esey Hulanda ta traha hunto cu Aruba, Corsou y Sint Maarten pa pone capacidad adicional, experticio y recurso disponibel pa combati crimen di ‘ondermijning’.

Secretario di Estado di BZK Eddie van Marum ta enfatisa importancia di e asercamiento pa habitantenan: “E gobiernonan den Reino ta comparti un responsabilidad conhunto pa combati e forma aki di ‘ondermijning’. ‘Ondermijning’ pues ta haci daño na funcionamento di administracion publico y e confianza di cuidadanonan den un gobierno honesto y integro. Habitantenan den henter Reino mester por confia riba un estado di derecho solido y resistente.”

E colaboracion entre Hulanda y e tres paisnan caribeense riba tereno di ‘ondermijning’ ta tuma luga tanto riba tereno penal como administrativo. Ademas tin colaboracion riba tereno di bon gobernacion y integridad.

ASERCAMIENTO PENAL Y ADMINISTRATIVO DI ‘ONDERMIJNING’

For di 2017, Hulanda ta sostene tres partner di cadena den e paisnan pa loke ta trata atendemento penal di ‘ondermijning’: pa medio di e Recherchesamenwerkingsteam, Ministerionan Publico den e paisnan y Huez Komun di Husticia. E añanan benidero lo enfoca riba mas capacidad y experticio pa haci investigacion penal tocante criminalidad financiero economico. Tambe tin mester di un mihor bista riba fluho di placa criminal. Pa un atendemento mas eficiente den esaki ta haci uso di hende y recursannan a base di informacion especifico. Pa e asercamiento penal a reserva anualmente 24 miyon euro.

Pa e asercamiento administrativo di ‘ondermijning’ ademas a stipula un protocolo. Ministerio di BZK ta destina anualmente 1 miyon euro pa esaki. Cu esaki e tres paisnan caribeense a lansa e campaña Not On Our Island cu e meta pa consientisa comunidat mas tocante ‘ondermijning’. E paisnan a pone tambe como meta pa na fin di 2026 tin un plataforma estableci, segun e modelo di Regionale Informatie en Expertise Centra (RIEC) na Hulanda.

BON GOBERNACION Y INTEGRIDAD

E ultimo añanan e paisnan caribeense a duna diferente paso riba tereno di bon gobernacion y integridad. Pa ehempel Sint Maarten tin for di 2019 un Camara di Integridad y na Aruba tin for di 2021 e Oficina di Integridad Aruba. Corsou tambe ta lantando un oficina di integridad. Ademas e paisnan caribeense a introduce reglannan pa financiamiento di partidonan politico y ‘screening’ di mandatarionan nobo y empleadonan publico ta ricibi ‘training’ di integridad. For di 2023 ta tene tur anja e Integrity Summit Dutch Caribbean pa promove experticio di funshonarionan di integridad. E meta ta pa realiza un Centro di Conocemento Caribeense pa Promocion di Integridad na 2026, cu por sostene tanto e paisnan como e Entidatnan Publico. Finalmente ta investiga den consulta cu e paisnan con por vigila mas mihor posibel progreso di e trayektonan riba tereno di bon gobernacion y integridad. Pa ehempel pa medio di National Integrity System Assessments cu ya a implementa den e paisnan. Cu Transparency International ta sigui deliberando tocante posibel instrumentonan di vigilancia, tomando na cuente nan conocemento y experiencia den sigui tendencia y corrupcion riba nivel mundial.