Rey Willem-Alexander ta ricibi participantenan di IPKO na Paleis

DEN HAAG – Rey Willem-Alexander lo ricibi e siguiente dialuna na Paleis Noordeinde e participante di e Interparlamentair Koninkrijsoverleg (IPKO). Asina portal Curacao.nu ta raporta. E lo tene un dialogo cu e delegacionnan di Aruba, Curacao, St. Maarten y Hulanda tocante tema cu ta toca tur paisnan di Reino huntu.

E IPKO ta un reunion semestral entre representante di pueblo di e cuater parlamento di Reino. E aña aki e reunion ta tuma luga for di 26 te 29 di september den Den Haag. Riba e agenda tin tema manera educacion, desaroyo geopolitico,  y e conseho di Raad van State tocante setenta aña di Statuut.

Diabierna e reunion lo wordo habri den sala plenario di Eerste Kamer. Ey, miembro di parlamento Caribe lo duna un presentacion riba e situacion actual den nan pais. Delegacionnan lo bishita tambe Haagse Hogeschool pa un  splicacion tocante e leergang Koninkrijkzaken y lo papia cu studiante Caribe.

Diasabra educacion vocacional lo wordo poni central y lo tin atencion special pa e situacion geopolitico. Paul Comenencia, consehero estatal den Raad van State, lo duna un explicacion di su conseho '70 aña Statuut pa Reino'. Mas lat  e dia ei, ex-presidente Richard van Zwol di Staatscommissie Demografische Ontwikkelingen 2050 lo discuti e consecuencia .

IPKO lo wordo clausura dialuna cu firma di e lista di acuerdo. E bishita di e delegacionnan na Paleis Noordeinde ta forma un di e punto cumbre di e reunion aki, cu por wordo sigui biba via livestream di Eerste Kamer. Potret di archivo di Antiliaans Dagblad di 2019 ora cu Rey a ricibi e delegacion di IPKO e tempo ey.