ATA: Conmemorando Dia Mundial di Turismo 2025: Turismo y Transformacion Sostenibel

ORANJESTAD - Aruba Tourism Authority tabata anfitrion di un encuentro influyente di lidernan, expertonan y partnernan di e industria di turismo na St. Regis Aruba pa papia tocante e futuro di turismo bou di e tema mundial di: “Turismo y transformacion sostenibel”.

E evento, cu ta forma parti di e preparacion pa e celebracion oficial di Dia Mundial di Turismo na Melaka, Malaysia dia 27 di september, a enfatisa e rol transformativo di turismo como un catalisado pa progreso social, innovacion y crecemento sostenibel. 

PUNTONAN DI E EVENTO

E programa di mainta a inicia cu palabranan di bonbini di Wendrick Cicilia, Minister di Turismo, Transporte y Labor, poniendo e tono pa e discucionnan di e dia.

Aaron Salā, Presidente y CEO di e Hawaii Visitors & Convention Bureau, a comparti e trayecto pionero di Hawaii pa turismo regenerativo, resaltando e lesnan den alinea turismo cu e balornan di comunidad, sostenibilidad y transformacion sistematico.

Ronella Croes, CEO di Aruba Tourism Authority, a sigui cu su discurso, conduciendo na e presentacion di Nominate Your Local Vacation Hero Award 2025. E premio aki a reconoce tres local extraordinario cu a laga un impacto duradero cerca e bishitantenan pa medio di bondad, hospitalidad y orguyo cultural, representando e berdadero spirito di Aruba.

E programa a continua cu Zeek Coleman, Vice Presidente for the Americas na Tourism Economics (un compania di Oxford Economics), presentando perspectiva riba “How US Economic Shifts Are Reshaping Travel Demand” y nan implicacionnan pa Aruba.

E mainta a conclui cu un panel discussion, sigui pa un sesion di Q&A, ofreciendo e participantenan un plataforma pa intercambia perspectiva riba formacion di un sector turistico mas sostenibel, inclusivo y resiliente.