Corsou ta manda delegacion di 8 parlamentario Hulanda pa IPKO

WILLEMSTAD – E delegacion di Comision di Asuntonan di Reino, Relacionnan Interparlamentario y Relacionnan Eksterior a sigui cu preparacionnan intensivo i ta sali awe diaranson 22 di september pa Hulanda pa e reunion di Ipko cu lo tuma lugar di 26 te 29 di september na Den Haag, Hulanda. Prome cu e reunion di Ipko cuminza, e delegacion di Corsou lo ta presente den Parlamento Hulandes dia 25 di september.

Riba e fecha aki lo trata dos proposicion cu ta di interes pa Corsou. Ta trata aprobacion di e tratado pa proteccion di persona relacional cu procesamento automatisa di informacionnan personal di 28 di januari 1981 y di e protocolo di 10 di oktober 2018 pa cambio den e tratado. Durante tratamento di e proposicion aki delegado special di Parlamento di Corsou, Ruthmilda Larmonie-Cecilia (PNP), lo hiba palabra.

Otro proposicion cu Parlamento Hulandes lo trata riba e dia aki ta un proposicion pa cambio di e lei di barco (“Schepenwet”). Esaki den cuadro di nesesidad pa modernisa reglanan den e ley. Ta bai entre otro pa exigensianan cu ta imponi riba e doñonan di barco i posibilidat pa hasi investigacion den caso di accidente. E delegado special di Parlamento di Corsou cu lo hiba palabra na momento cu ta trata e proposicion aki ta Ramon Yung (MFK).

Riba 25 di september e Comision di Asuntonan di Reino, Relacionnan Interparlamentario i Relacionnan Eksterior lo topa tambe cu e delegacionnan parlamentario di Aruba i St. Maarten den un reunion tripartit. Esaki pa atendi topiconan di interes comun di e tres paisnan, pero tambe pa prepara pa e reunion di Ipko. Riba agenda tin entre otro e proposicion di e paisnan den Caribense pa yega na un Arreglo di Disputa pa Reino Hulandes, cooperacion entre comisionnan parlamentario di e tres paisnan i preparacion pa e reunion di Ipko plania pa tuma lugar na januari 2026 na Aruba.

Dia 26 di september e reunionnan di Ipko mes lo cuminza. Prome cu habri e encuentro entre e cuatro parlamentonan den Reino, e presidio di Ipko lo bini huntu pa fije e agenda definitivo. Puntonan cu tin entre otro riba e concepto di agenda ta e conseho no solicita di Raad van State den cuadro di 70 aña Statuto di Reino, relacionnan financiero den Reino, conexion cu enseñansa i bibienda pa studiantenan na Hulanda, desaroyonan demografico i desaroyonan geografico den mundu. Na final di e reunionnan e delegacionnan lo yega konhuntamente na un lista di palabracion final.

E delegacion di Corsou ta consisti di e miembronan di e Comision di Asuntonan di Reino, Relacionnan Interparlamentario i Relacionnan Eksterior, cu ta David Seferina (MFK, presidente), Ramon Yung (MFK, vise presidente), Maria Nita (MFK), Frenciss “Renny” Lourens (MFK), Quincy Girigorie (PAR), Ruthmilda Larmonie-Cecilia (PNP) i Giselle Mc William (MAN-PIN). Presidente di Parlamento, Fergino Brownbill, ta hefe di delegacion di Corsou. Dia promé di oktober e delegacion lo bolbe buelo rumbo Corsou. NOTA:Texto ta scirbi den papiamento fonetico di Corsou.