Otmar Oduber ta splica, pakico retira awor, y rumor di un otro trabou cla caba p’e

ORANJESTAD – E noticia diaranson anochi di retiro di Parlamento, di Otmar Oduber di partido PPA, ta sigui ta topico di combersacion. Y pa varios motibo. E timing, y e motibo. Y mientras cu Oduber a splica su mes den un comunicado y clarifica algun cos den algun entrevista, a keda algun pregunta toch pendiente. Pakico awo? Noticiacla apenas algun ora a publica decision di corte cu ta rechasa e peticion di Oduber pa obliga Parlamento.

PAKICO AWOR

Noticiacla a puntra sr Oduber pakico a opta pa retira, pa traha riba su caso? Esaki mientras cu otronan (Benny Sevinger, Mike de Meza:red), a sigui traha como parlamentario y no a retira pa traha riba nan caso. Segun sr Oduber, e decicion pa tuma un paso atras for di Parlamento ta netamente pa mustra cu no mester un ley pa haci loke “fatsoen” ta rekeri.  “ Kiko mi kiermen cu esaki ? Cu un persona ora ta actua conforme su principionan no mester ley pa oblige haci loke e ta considera lo corecto. Mirando e respet cu mester tin entre e institutonan cu ta forma e Trias Politica, ta incorecto pa for di e stoel di Parlamento hiba un lucha (bataya) contra e abusonan di un Ministerio Publico cu a permiti su mes pa worde manipula politicamente. Un Ministerio Publico cu na Aruba ta haci loke na Hulanda no ta permiti ni tolera. E ta keda na cada consenshi si bo a sinti pa sigi cobra salario di pueblo pa bringa e mesun sistema. “You can not fight the system if you are part of it”. Oduber a bisa. 

ODUBER TIN OTRO TRABOU? 

Un otro pregunta pa sr Oduber cu Noticiacla a haci, ta cu ‘caya’ ta papia cu e lo a haya trabou den comercio caba, y pesey ta retira. Y cu cu ta un di e motibonan pa cual e la opta pa no tuma overbruggings toelage, cu ta e areglo pa tur gobernante cu bandona su funcion prome cu tempo unda cu e tin derecho di 70% di su salario anteior pa periodo di un aña. A splica sr Oduber cu un persona no ta baha sin mas asina, cu peso financiero di un caso penal, sin cu e tin un trabou otro caminda, manera ta e caso di dje. Riba esaki, sr Oduber a contesta cu su persona apesar di tin e derecho di cobra “overbruggings toelage” pa ley, ta opta pa no haci esaki, pa no duna e “schijn” cu ta pa e motibo eybta retira temporalmente. “ Mas ainda mirando cu den pasado ya mi cobra esaki. Di otro banda, mi persona financieramente (cu debenan ya acumula y gastonan adicional pa worde haci) no por ta dependiente di un entrada di overbrugging paso e ora calkier entrada extra cu mi ricibi, lo worde deduci di e overbrugging cu ya caba ta un porcentaje di e salario original” e la sigui bisa. “Danki Dios semper, cu mi conocimento y experiencia, a logra tin mi clientenan ora mi tawata pafo di politica mediante mi Consultancy (nunca gobierno ni niun instancia di gobierno). Awe mas cu antes, e confianza tey den mi persona y mi trabao”. 

DIFERENTE SENTENCIA LO A CAMBIA DECISION DI RETIRO?

A puntra sr Oduber cu si e sentencia di diaranson, cu ta mantene e decision di Parlamento pa prohibie di biaha como parlamentario, tabata diferente (e la perde e caso ey diaranson:red) cu si e lo a no retira of anuncia su retiro. E pregunta specifico tabata “Si bo a gana e caso ayera, e desicion di retira, lo a sigui?”? e contesta di Oduber tabata “100%”. Ademas, e la confirma diahuebs mainta den un otro conferencia na Noticiacla, cu e decision di retira, a keda tuma y participa na partido PPA dos siman pasa caba, pues hopi prome cu e sentencia a cay. 

BIAHA PA HULANDA

Oduber mientrastanto a confirma pa e portal aki tambe, cu diadomingo awor e y colega di partido Pieters, ta biaha pa Hulanda pa entrega e documento cu e la presenta diahuebs mainta na Parlamento, na mandatarionan Hulandes.