Colombia, Argentina y Brazil entre e 18 paisnan clasifica caba pa mundial di futbol 2026

NEW YORK – Colombia, Argentina y Brazil ta entre e 18 paisnan (di e 48 paisnan) ya clasifica pa e mundial di futbol pa 2026. E tres paisnan aki ta faboritonan grandi na Aruba, y e ta haci e copa asina mucho mas interesante. Un otro ekipo cu ta e faborito, obviamente ta e seleccion di Hulanda. Sinembargo ningun ekipo Europeo ainda ta clasifica, aunke e chens pa Hulanda ta grandi, ya cu e ta na cabez di su grupo ainda. Corsou, tambe ta na bida ainda den su grupo como di dos despues di Jamaica. Corsou tin cu hunga atrobe na oktober y si e logra clasifica, e ta bira e pais mas chikito na mundo cu ta participa na e mundial. 

E PAISNAN CU TA CLASIFICA

E paisnan cu a clasifica automaticamente, ta esnan cu ta anfitrion di e copa, esta Merca, Mexico y Canada. Ta sigui e paisnan asiatico, Japon, Jordania, Australia, Sur Korea, Iran y Uzbekistan. Africa tambe tin dos pais clasifica, cu ta Marocco y Tunisia. Y ta sigui Sur America, cu tin Argentina, Brazil, Ecuador, Uruguay, Colombia y Paraguay. Y finalmente di Oceania, tin Nueva Zelandia.