Welga cortico di personal di tera di KLM a caba pero a afecta Aruba

SCHIPHOL - Personal di tera di KLM a pone trahamento abou awe mainta pa dos ora. Door di e welga aki, mas o menos 27.000 pasaheronan a wordo afecta. Entre 08.00 ora y 10.00 ora a welga entre otro hende cu ta carga y descarga bagage, ta move avionnan, y tambe ta atende pasaheronan. Segun un reportero cu tabata presente, e atraso nan no tabata hopi grave. Sinembargo Noticiacla a compronde cu e buelo pa Aruba awe,  si a sufri un retraso di por lo menos 2 ora. 

APOYO

Sindicato FNV y CNV a duna apoyo na e welga, pasobra nan no tabata satisfecho cu e acuerdo di cao cu tres otro sindicato mas chikito a firma. FNV ta mas no satisfecho cu e aumento di salario cu a wordo acorda den e acuerdo, pero sindicato ta desea tambe cu tin un regla mihor pa trabou pisa, y mas trahadornan fiho pa e personal di tera.

OTRO SALIDA 

Tampe lider di CNV, Souleiman Amallah, a bisa cu e preferi un otro salida. “KLM por a evita e welga aki hopi tempo atras, dies luna pasa, pero awor nos ta aki y lamentablemente e ta na costa di e pasaheronan y e operacion. Pero ta importante cu tin un reparticion honesto entre pilotonan, personal di cabina y e personal di tera.”

IMPACTO

E 14.000 trahadornan di tera riba Schiphol tin responsabilidad pa carga y descarga di bagage y carga, move avionnan, y pa seguridad. Nan tambe ta yuda pasaheronan den aeropuerto of ta traha den control tecnico. Sin e personal aki, avionnan no por sali ni landa.