DIMP: A registra mas di 33 mil cita pa busca plachi pa vehiculo di motor

ORANJESTAD – Casi nuebe luna despues cu oficina di impuesto a cuminsa cu e proceso ‘nobo’ pa registra pa un plachi nobo di vehiculo di motor, a publica e cifranan di e resultado di e proceso. Y cu un sonrisa, e vocero Meverly Romano a mustra cu di un encuesta cu a tene durante e proceso, 90% ta hopi contento cu e proceso, y apenas 10%  (di esnan cu a participa) a haya e proceso hopi malo. Mester bisa si cu 5709 persona a participa na e encuesta y 5653 a duna un resultado bek. Mes momento, 33.602 cita a keda registra durante e periodo. 

CITANAN

Manera indica caba, for di momento cu a cuminsa cu e proceso di cita, dia 11 di December 2024 pa awor, a pidi 33.602 cita, di e momento ey, cu ta sigui te januari 2026, cu hende tin cita pidi. Pero mayoria ta cla pa September. Di e cifra di 33.602 cita, 4.957 tabata pa e grupo di pensionado, 26.728 tabata pa ciudadanonan priva, 1737 pa compania, 89 tabata registro nobo y 91 tabata pa gobierno. For di momento cu a cuminsa cu e registro, e luna cu tabatin mas solicitud, tabata luna di juli unda cu tabatin 4881 cita registra. 

E SITUACION ACTUAL

E situaciona actual, ta cu 14.235  cliente, no a cumpli cu nan pago di number di auto, di cual  6681 a paga solamente e prome mitar di e aña, y un grupo mas grandi, 7554 no a paga nada mes. Y total, pues tin 14.8% cu no a cumpli cu e pago di number di auto pa 2025. 

KICO AWOR

Mirando e situacion, por determina cu mayoria di hende y compania a busca nan number di auto caba, y como tal a avisa polis di e situacion. Polis di su banda, a informa cu entrante 1 di october, ta cuminsa mas activo cu control, ya cu despues di 1 di October, ningun hende por tin e plachi cora cu blanco mas.