Desiree Croes a kibra silencio riba su ‘issue’ cu Gerlien Croes y a ‘kibra’ cu partido AVP

ORANJESTAD – A  tuma ex politico Desiree Croes 6 pa 7 luna dicidi prome cu e ‘basha’ abou riba un situacion politico y a ‘kibra silencio’ riba algo cu a sosode cu ne internamente den e partido berde AVP. Den un video live riba su pagina diahuebs anochi, Croes a expresa su mes, relaciona cu un votamento cu a tuma lugar e siman aki pa (ainda) e por bira minister plenipotenciario na Hulanda of no. E mocion no a pasa. Y hunto cu algun punto cu e la conta di dje, e la dicidi awor cu ta basta y cu e ta kibra tur relacion cu e partido berde AVP. E partido cu e la bisa, su famia a sostene semper den bon y den malo. 

REUNION DRAMATICO

E ex politico a bay bek tres aña den tempo, den 2022, unda cu e la retira di e partido, pasobra tabatin trato den partido cu e no a gusta, e derecho di LGBT, y e ora e la retira di e partido. Despues e la haya bishita di Gerlien Croes, cu pa tres ora a fula tera pa bandona e partido e tempo ey. (Desiree) Croes a yama e reunion bon, productivo, unda cu Desiree a duna Gerlien conseho riba su retiro. Despues Desiree Croes a haya invitacion pa bin bek, pa yuda saca Benny Sevinger for di partido. Algo cu e no a haci. A resulta cu e tempo ey tabatin problema cu Gerlien Croes tambe. Aki Gerlien lo a lanta para y grita Mike Eman (e lider), pa cual Desiree a hala su atencion, pidiendo Gerlien pa respeta  e lider y a bise cu e tin ‘tenchi largo’. Algo cu Gerlien lo no a gusta. Despues, segun Desiree, e la bin tende cu Gerlien a bisa cu ta Desiree lo a sake for di partido. Algo cu Desiree ta considera ridiculo. Y segun Croes (Desiree), 70% den e sala tabata pensa mescos pero no kier a bise. 

MIEDO DI STUL

Segun Croes, fraccion di AVP tin miedo di perde stul, y pesey ta actuando e forma con nan ta actuando. Y hopi den partido no kier papia, manera cu mester ta, cu excepcion di Mike de Meza, cual e ta defendiendo como abogado. E ta papia tambe cu tin falta di transparencia y respet den e partido berde. E la admiti cu un minister den partido, lo a bise cu si e la keda keto, y no defende de Meza, awe e mes lo tabata minister plenipotenciario, osea indicando cu e mester a bay na amen di otro.