• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Minister plenipotenciario di Corsou na Hulanda ta suspende dos personal di su gabinete

DEN HAAG / WILLEMSTAD.– Minister Plenipotenciario Carlson Manuel a suspende dos trahador di su gabinete. Asina Manuel mes ta informa riba rednan social. E ta indica adicionalmente cu e desicion pa suspende e dos trahadonan ta un medida di orden temporal y no un castigo disiplinario.

Motibo pa e medida di orden temporal ta pasobra, segun cu Manuel a bisa, a inicia un investigacion riba e dos empleadonan aki y mientras esaki ta andando no lo tin mas comentario di parti di e minister plenipotenciario. “Ora conclui e investigacion lo suministra mas informacion”, Manuel a bisa.

Tampoco Manuel a duna informacion di e motibo(nan) pa a lansa un investigacion contra e dos empleadonan. Mientras tanto tin un preocupacion grandi den parlamento riba maneho financiero na Cas di Corsou cu fondonan di parlamento. Mas cu seis siman pasa lider di fraccion di PAR, Quincy Girigorie a hasi pregunta na presidente di parlamento, Fergino Brownbill riba e topico aki.

E siman aki Girigorie a manda un carta di rekordatorio pa Brownbill mustrando cu for di 17 di juli, el a manda 12 pregunta relashona cu informacionnan preocupante cu tabata circula den medionan di comunicacion riba e relashon financiero entre Cas di Corsou y parlamento di Corsou. E lider di fraccion di PAR ta indica den su carta cu respuesta riba su preguntanan ta di suma importancia pa parlamento por tin un bista real riba e situacion na Cas di Corsou. “E situacion ta keda un preocupacion, mirando e nesesidat resien pa sindicato ABVO sinta cu minister plenipotenciario riba e situacion serio di trahadonan di Cas di Corsou.”

Ademas, Girigorie ta bisa mas aden den su carta cu seis siman a pasa sin cu el a ricibi respuesta riba su preguntanan. Esaki segun e lider di fraccion di PAR ta viola e protocolo entre parlamento y ministernan, a base di articulo 96 di reglamento di orden. “Apesar cu e protocolo no ta legalmente aplikabel riba bo persona, e ta un guia pa parlamento por hasi su trabou na un forma efectivo y ta di spera cu presidente di parlamento ta mantene su mes estrictamente na e protocolo aki.”

Pa medio di su carta di rekordatorio Girigorie ta hasi un apelacion urgente riba presidente di parlamento pa contesta su preguntanan e siman aki ainda, pa mas tarda djabièrne 5 di september, pa asina e por hasi su trabou parlamentario di forma efectivo.

Den su carta cu pregunta di 17 di juli Girigorie ta indica cu e supuesto “sospecho di irregularidadnan” ta trese un mancha skur riba tanto Cas di Corsou como parlamento di Corsou y mester trata esaki cu e urgencia y transparencia nesesario. Si den pasado, presidente di parlamento, den kuadro di transparencia y integridad di e organo a entrega keho contra un miembro di parlamento sospecha di a entrega dokumentonan irregular na parlamento, den e caso aki tambe ta sumamente urgente y nesesario pa bini transparencia pa parlamento y comunidad completo riba e supuesto disputa cu tabatin entre parlamento di Corsou y Cas di Corsou riba fakturanan paga, Girigorie a sigui bisa.

“No por ta asina cu transparencia y integridad ta conta pa un persona of partido so y no ta conta pa un persona di un otro partido. Den e caso aki ta trata di fondonan publico cu mester responsabilisa y cu ta mustra cu pa añanan esaki no a socede y a tapa. Ta bisto cu den tur e informacionnan cu ta circula, tin detallenan cu no ta cuadra cu berdat y cu mester wordo clarifica.”

Girigorie ta finalisa bisando cu ta solamente transparencia di informacion por trese claridad y caba cu tur spekulacion pa asina comunidad por tin bista di kiko realmente a socede. “Nos ta confia cu presidente di parlamento ta duna e echo aki e urgencia nesesario, pa asina parlamento y comunidad por tin un bista con a y ta atende cu fondonan publico.”