Loke RMR a haci, no ta aproba e version final di ley ‘HOFA’

DEN HAAG/ ORANJESTAD – Ningun momento e concepto final di e Rijkswet Houdbare Overheids Financien Aruba (HOFA) pa supervision financiero na Aruba a wordo aproba pa RMR (Conseho di minister di Reino), manera cu cierto politiconan kier pretende na Aruba e siman aki. Asina contactonan den gobierno Hulandes a sigura Noticiacla e siman aki. Ta compronde e conmocion, pero e no ta manera cu ta wordo ‘bendi’ aworaki, a splica Noticiacla. Loke a sosode si, ta cu RMR a bay di acuerdo cu e ‘concepto’ di e ley manera proponi, pero esaki ta necesario djis pasobra esey ta e siguiente trayecto cu mester inicia e siguiente proceso. Esey ta diferente cu acepta e ley como un producto ‘final’. Pues loke cu RMR a haci awor, ta acepta e concepto como ricibi y lo sigui awor cu e proceso, unda cu ainda por tin cambio. “Y na caminda, e respectivo parlamentonan por haci nan remarkenan”. 

CONSULTA DIGITAL

Loke e aceptacion di RMR di diabierna ta haci, ta inicia e proceso di consulta digital, osea e asina yama ‘internet consultatie’. Durante un luna largo, cualkier persona por subi internet y duna su comentario riba e ley, sea e ta guste of no. E proceso aki oficialmente a cuminsa dia 29 di augustus 2025, y ta vence dia 28 di september 2025. Por nota cu por lo menos 4 persona a reacciona publicamente, cual reaccion por lesa tambe. Entre nan, tin ex parlamentario Mansur. Solamente si esnan cu reacciona, indica esaki, e reaccion di e persona lo keda publica. 

RAAD VAN STATE 

Despues di dia 28 di september 2025, e ley ta bay pa e.o. Raad van State na Hulanda, Raad van Advies di Aruba y e respectivo parlamentonan, pa asina nan duna nan analisis di esaki. Y finalmente, e ora, cu tur e proceso cana su caminda, e proceso ta bin pa RMR aproba e ‘producto final’.

PARLAMENTO DEN SCURIDAD?

Cu Parlamento tabata den scuridad, tampoco ta berdad segun fuentenan den Parlamento na Aruba a informa e portal aki, pasobra durante consultanan cera (osea den reunionan no publico) a haya varios actualisacion di e departamentonan concerni riba e ley. Pues nan tabata debidamente na altura riba e loke tabata sosode. Y como tal, Parlamento lo tin su debido tempo pa ainda bin bek riba e contenido di e ley aki. Y aki por vocifera e respectivo comentarionan.