Partido politico na Corsou tambe kier permiso di trabou pa 20.000 persona sin documento

WILLEMSTAD – E partido politico di oposicion PAR ta propone pa introduci un periodo di gracia di seis luna durante cu trahadó sin documento na Corsou por registra nan sin riesgo di deportacion. Despues di un screening, nan lo ricibi un permiso di trabou pa tres aña. Segun e partido, ta trata di mas o menos 20.000 persona cu ta traha riba e isla awor aki. Cu e plan aki, PAR kier no solamente mehora e posicion di e grupo aki, pero tambe fortifica e fondo social. E partido ta calcula cu legalisacion por duna un ingreso anual di 90 milion florin extra pa e Fondo di Seguro di Biehes (AOV) y otro prima social. Den dies aña e cifra aki por yega 900 miyon florin.

E permiso ta costa 1.500 florin pa aña y ta valido pa tres aña, similar cu e sistema na Aruba. PAR ta enfatisa cu solamente persona cu ta traha awe lo por aplica. Nan lo wordo screened riba nan preparacion, experiencia y si nan ta cumpli cu e nesecidad di trabou na Corsou.

Segun e partido, Corsou tin mas o menos 30.000 persona sin documento, di cual mas o menos 20.000 ta apto pa traha. E prome plan aki ta yuda pa tin un mihor bista riba e grupo aki, proteccion contra explotacion y un “integracion responsable” den sociedad.

CONTEXTO POLITICO

E tema di persona sin documento a wordo discuti hopi biaha den e agenda politico. E gobierno a anuncia mas promé e aña aki un relajacion parcial di e moratorium riba permiso di trabou pa algun sector especifico, pero e regla aki no ta conta pa e gran grupo cu ta traha sin papel.

Antes tambe otro partido y organisacionnan social a pidi pa un manera mas structural pa aborda e situacion, tambe pa combati falta di trahador den e mercado laboral. Especialmente den sector manera construccion, cuido y horeca, e demanda pa personal ta grandi. PAR ta presenta e plan aki como un manera di legalisacion, resaltando tanto beneficionan economico como respeto pa derecho humano. Potret Curacao.nu