- Gabinete Pisas a pidi retiro di dos di su ministernan di su gabinete
- Opinion: E post cu tur sa tabata bin: clapchi.
- AZV a lanza logo relaciona cu 25 aña di seguro AZV
- VIDEO: Grupo di prensa local a conoce e restaurant mas nobo ‘Gaia House of Grill’ na JOIA Aruba
- Famia di turista cu a muri tragicamente na Aruba, ta papia, y curpa ta 'pega' na Aruba ainda
Analisis: Power Ranger for life! Celebrando cu POWER FM
Scirbi pa Tito Laclé
E siman aki, e emisora Power FM 101.7 ta cumpli 13 aña operando den aire den su formato como tal. Mi kier a dedica e analisis aki, na e emisora aki, cu for di su momento di lansamento a bira un parti instrumental pa pa mi, y consecuentemente Noticiacla y su historia. De echo, ora cu Noticiacla a nace 11 aña pasa, POWER FM tabata e UNICO emisora cu a bay live cu e lansamento aki. Algo cu no ta facil pa lubida. Ademas, durante curso di su existencia, POWER a brinda Noticiacla e espacio pa comparti noticia tur merdia, tambe den un formato inusual, cu finalmente a bira ‘e noticiero pa scucha’. Un formato unda cu un laiko, (un persona cu no ta den e ramo), ta sinta tur merdia cu un periodista y ta trece noticia, y e comentario mesora su tras. E laiko, tabata nos amigo Eterno Ruben Garcia (DFM), y e periodista tabata ami. Mi no a kere den e formato, pero mi a wordo proba hopi pero hopi robez. E emisora semper tabatin un lugar special den mi curazon. Y despues cu e noticiero a para, y cu Garcia a bay sosega, e amor pa e radio a keda. Ultimo tempo (aña), a desaroya un otro relacion entre e emisora y Noticiacla, Algo cu a cuminsa como un curiosidad di e director actual Ralph Maduro, cu a bira un custumber practicamente. Cada pasa siman of tempo, Ralph ta yama mi, y nos ta bay LIVE, den su programa, kizas mei ora y te hasta un ora completo! Un ora completo di Papiamento, unda cu durante e orario, normalmente lo mester tin musica. Pero, sentido comun ta dicta, cu si Ralph ta yama asina hopi, ta pasobra tin un demanda, y cu e mes ta aproba esaki. E reaccion, mi a compronde tambe, tabata y ta fenomenal. Y como tal, den mundo di negoshi, unda cu tin demanda, tin produccion. E comentarionan tabata hopi biaha, pa no bisa tur ora, cu e combersacion entre Ralph cumi, tabata alcaso, educacional y hopi informativo. Mi forma di duna noticia, no ta pa supone, asumi, sino pa educa y informa. No asumi cu tur hende SA e terminologia noticioso (news jargon), SA e situacion automaticamente, sino mas bien, cu na final di e combersacion, TUR hende ta MES bon informa, hasta pa esun cu tabatin varios dia for di noticia, y awor bo ta mes bon informa cu esun cu ta dedica na noticia diariamente. Esey ta nos relacion. POWER FM ta un emisora hopi inovativo, no a para keto y te hasta a yega na su propio edificio, y modernisa tecnicamente pa e tin e ultimo di lo ultimo. Niun hende no ta perfecto. Y den e caso aki, e ta conta pa POWER FM tambe. Pero, mi por bisa bo cu tur trankilidad, cu mi ta sinti mi bon cu POWER FM, un emisora cu ta serio, alcaso y cu tey pa sirbi e oyente. MI no ta un hende facil, mi ta hopi ‘kieskeurig’.. Mi historia a cuminsa na radio na mei di 1980, na Radio Carina cu mi prome news talk show, y a bay via e grandinan, Canal 90, Magic y yega na POWER. Y mi por bisa cu boca grandi, cu POWER tin tur cualidad di ta un radio serio, pret, y ta haci su trabou di informa, entretene y mas. Hopi trahado a bin y bay, pero e emisora tey keto bay. Y ta pa algo. Haci radio awendia na Aruba NO ta facil. No ta barata y sigur, un reto tur santo dia. Pesey mi ta desea for di su director Ralph Maduro, te na su persona mas lief, Juju, un pabien caluroso, y cu e emisora por celebra hopi 13 biaha mas. Y danki pa a duna mi y Noticiacla e espacio y tempo, pa por comparti nos informacionan cu e pueblo di Aruba. POWER RANGER for life!
AZV a lanza logo relaciona cu 25 aña di seguro AZV
ORANJESTAD – Recientemente meymey di invitadonan y partnernan di sector di cuido di Aruba, di Colombia y e famia di Organo Ehecutivo AZV (OE AZV), Prome Minister Mike Eman, Minister Mervin Wyatt-Ras y director di OE AZV Edwin Jacobs a desvela e logo cu durante 2026, OE AZV lo uza relaciona cu 25 aña di existencia di nos seguro AZV.
VIDEO: Grupo di prensa local a conoce e restaurant mas nobo ‘Gaia House of Grill’ na JOIA Aruba
ORANJESTAD – Un grupo di prensa local a keda invita diabierna ultimo, pa e evento titula ‘The First Table at Gaia’, cu ta duna e grupo selecta di prensa, un prome bista di e restaurant mas nobo di Aruba, Gaia House of Grill, situa den e hotel mas nobo di Aruba, JOIA Aruba by Iberostar. E gerente di mercadeo di JOIA Aruba Rudolfo Dirkz a splica en corto, con a bay cu e anochi special aki.
Famia di turista cu a muri tragicamente na Aruba, ta papia, y curpa ta 'pega' na Aruba ainda
ORANJESTAD - Famianan di un mama di suburbio cu tin cinco yiu a publica un comunicado despues di cuater dia despues cu nan a haña su kurpa morto den un cuarto di hotel na Aruba, despues cu su esposo a salta for di e dak pa su morto. Noticiacla a compronde tambe cu e curpanan ta na Aruba ainda, debi na un situacion logistico. Un scanner cu mester trata e curpanan prome cu pone nan riba avion bek pa Merca, ta defecto, y tanten cu esaki no sosode, e curpanan no por bandona Aruba. Mientrastanto e comunicado cortico di e famia ta bisa:” Cristina (e señora cu a wordo haya morto den e camber), tabata mama di cinco, abuela, yiu, ruman, tia y un miembro valioso di su famia y comunidad”. “Lo recorda su dedicacion pa su ser querido y e influencia positivo cu e la tene riba tur hende rondo dje” .
Pastoor Jairo:”Mi no a perde rumbo! Simpelmente mi ta gusta ta den pueblo di hopi forma”
ORANJESTAD – “ Kisas bo no ta di acuerdo cu mi. Kisas bo ta pensa cu mi a perde rumbo di mi bida como Sacerdote of kisas mas cos tin den bo cabez! Ora bo ta pensa esey, ta esaki mi por bisa bo pa awor!” tabata reaccion di pastoor Jairo Maduro, riba critica entre otro riba e echo cu e ta fungiendo awor tambe como ‘prins’ di Carnaval 72. “ Siendo un Sacerdote pa 21 aña caba y hopi feliz di mi vocashon, mi ta sinti cu mi mester ta den pueblo den su celebrashonan y tambe den su luchanan y dolornan” e ta sigui bisa. “Mi ta gradici Dios cu mi por haci esaki tambe! Pasobra realmente ta hopi cos mi sa haci y algun di nan ta tras di cortina! Ta den pueblo kiermen, duna e mihor dibo y sa kiko ta biba den cada curazon.Mi curpa a bisti diferente bistir of trahe, pero e bisti cu ta marca mi funshon ta un Sotana preto cual tambe tin biaha no ta ser aprecia, pero cu ta laga tur hende sa cu mi ta un homber di Dios, manifestando cercania, compashon y alegria tur momento”. Segun Maduro, e no ta un mundano, pero ainda e ta bibando den e mundo aki y sintiendo juzgamento y amor na mes tempo, pero cu e no tin problema cu esey. “ Den e dianan aki lo bo mira mi den ambiente di musica, alegria, pero mi kier bisabo cu tambe mi ta cana den gang di Hospital, mi ta bishita Hospice y casnan di grandinan tin biaha den oranan di marduga pa tene man di esnan cu ta saliendo di e bida aki y pa duna consuelo pa esnan cu ta keda! Tur dia mi ta para tras di un mesa grandi pa celebra Hesus bibo den Eucaristia cual ta mi mayor forza! Mi no a perde rumbo simpelmente mi ta gusta ta den pueblo di hopi forma!”
CTB ta mercadeando e isla diferente awor cu Corsou a clasifica pa Mundial di Futbol 2026
Prome minister Mike Eman ta invitado di Noticiacla LIVE awe nochi!
ORANJESTAD – Awe nochi prome minister di Aruba Mike Eman ta e invitado di e programa Noticiacla LIVE. Durante e programa aki, periodista Tito Laclé lo toca temanan di actualidad manera e anuncio recien di salida di Eman for di politica (retira como lider di AVP), situacion geopolitico y e efecto pa Aruba, e relacion cu Hulanda, logronan den e prome aña di gobierno, y mucho mas. Sigur un programa cu bo no kier perde. E ta cuminsa 8’or y mei y por tin un duracion maximo di un ora, compara cu e tempo normal di mei ora. E ta riba e pagina di Facebook di noticiacla 2.0 y mesora despues riba e pagina di Youtube di noticiacla. No perd’e!
Follow NoticiaCla
