Na Corsou, compania di electricidad a ricibi 135 peticion di claim di e blackout recien

WILLEMSTAD – Un total di 135 peticion a yega cerca Aqualectra den forma di claim di clientenan cu a ceda afecta debi na e blackout di siman pasa. Aqualectra ta e compania di electricidad di Corsou. Diaranson, 27 di augustus madruga, Corsou a conoci un blackout cu a tuma luga 2:51 di madruga. Despues di varios intento, a cuminza reconecta bec 2:41 di merdia i pa diahuebs madruga 1:08 tur cas tabata tin corriente atrobe. Un bez tur cas a ceda reconecta, tecniconan di Aqualectra a sigui monitoria nan red di cerca, pa asina garantiza stabilidat pa cada cas di famia i negocionan na Corsou.

Tabatin clientenan mas grandi manera hospital, crannan di haf i plantanan di awa di Aqualectra mes cu temporalmente a ceda desconecta for di e red i mester a ceda reconecta gradualmente pa motibonan operacional. For di 6’or di mainta riba diahuebs 28 di augustus, a cuminza reconecta e clientenan aki tambe.

Durante henter e proceso i te ora cu cada un di cliente a ceda conecta, a sigui cu comunicacion estrecho cu cada un. Den e dianan despues di e blackout, Aqualectra a mobilisa su timnan completamente, pa mantene stabilidad di e red i atende interupcionnan isla pa mas lihe posibel. Na mes momento, a activa departamentonan administrativo pa atende tambe cu claim di clientenan cu por a experiencia daño na nan aparato electronico pa motibo di e blackout.

Aqualectra a publica su procedura di claim, di moda cu clientenan por sa con pa entrega nan peticion. Clientenan cu entrega informacion completo, lo haña nan claim procesa den diez dia di trabou. Den algun caso un tecnico lo por drenta den contacto pa bin wak e situacion cerca e hende su cas. Entretanto Aqualectra a ricibi 135 peticion di claim.