Compania local PokPok,cu ayudo di banco AIB ta yuda aporta na produccion di webo local

ORANJESTAD - Dialuna 1 di september ta bira un dia di gran importancia pa sector primario na Aruba. Specialmente pa e famia emprendedor di sr David Kock cu ta maneha e compania di produccion di webo local, PokPok. Gobierno di Aruba a duna di su parti pa e compania logra ricibi un tereno  pa e expansion di produccion di webo.

Aworaki e produccion di webo local ta 14.2% di e total di webo cu Aruba ta consumi. E meta ta pa yega 100% cu produccion di webo local. Cu e expansion aki e meta ta pa yega 60% den e prome fase. Despues lo continua pa sigui subi esaki.

“ Como gobierno nos kier yega na un nivel mas halto di siguridad alimenticio pa Aruba. Esaki ta un proyecto cu ta contribui grandemente pa logra esey” minister Geoffrey Wever a bisa.

AIB, un banco local a dicidi di no solamente presta e capital necesario na e comerciante, pero pa tambe participa como partner den e proyecto aki. Esaki ta hustamente e tipo di partnership entre sector priva y sector publico cu e sector mester mas di dje pa por sigi crece y desaroya pa por bira un pilar economico fuerte.