Dowers: Tin duda cu Centro Di Polis na ex Codemsa ta sigui

ORANJESTAD – No ta sigur cu e proyecto pa comberti ex edificio di Codemsa den un Centro di Polis ainda. Asina minister di husticia, Arthur Dowers a bisa recientemente den e programa Noticiacla LIVE, di cual e tabata e invitado. Segun e mandatario, contrario na pensamento anterior, tin duda ainda cu e proyecto lo continua, mirando cu tin varios problema cu e caso. Entre nan, e doño di e edificio, APFA, lo kier re-evalua e deal, mirando cu e tardansa no ta haci e proyecto factible bou di e terminonan actual. 

STATUS DI PROYECTO

E mandatario a bisa cu ora cu e la bira minister di husticia bek, e no tabata sa e status di e proyecto. Y e minister anterior lo a bisa cu tin por lo menos 5 persona cu e por a puntra pa haya un update. Pero e la invita tur hende pa check cu e personanan aki y tende cu si di berdad ta asina, indicando cu e informacion ey no ta cuadra. “Welliswaar nan kier haci algo. Nan lo a palabra cu kier cobra huur di 178 mil pa luna pa e facilidad aki” Dowers a bisa. 

TARDANSASegun Dowers, den combersacion cu APFA, e proyecto ta di tanto tempo pasa, cu e no ta alcansabel mas. Por lo menos no pa e suma ey, y tampoco asina grandi. Awor tin cu bay combersa atrobe cu otro, y wak si e proyecto ta bay door si of no. 

COS MESTER A KEDA CLA NA 2025

E proyecto mester a cuminsa construccion na 2024 y caba na 2025, segun ex minister Rocco Tjon a anuncia na December di 2023. E lo a reuni cu APFA e tempo ey, y cos lo mester a cuminsa lora. Pero na 2024 cos a bolter ora cu a bin eleccion delanta cu a para tur cos practicamente. Awor, doñonan di e edificio ta mustra cu e loke a palabra, practicamente no ta vigente mas, y cu lo mester negosha un deal nobo. Segun minister Dowers, no por a haya ningun acuerdo firma, cu e deal tabata uno cla.