Aruba a lucha duro, wanta wega, pero finalmente cay venci contra Taipei

WILLIAMSPORT – E seleccion di Aruba den representacion di Caribe den e Little League World Series 2025, a cay venci contra e representante di Asia, Taipei Chines cu e score minimo di 1-0. E wega a bira un duelo entre e pitcher Liu Wei Heng di Taipei y Jayderick Wederfoor di Aruba. Na final, Chen Qi Sheng a tuma over den ultimo inning, mientras cu Jeter Filiciana a tuma over pa Aruba den di 4 inning. Aunke cu Aruba a perde, nan a permiti apenas 2 inning contra 4 cu nan mes a logra, pero na final, ta careda ta conta y Aruba a cay venci. 

HISTORIA

Mester bisa cu esaki ta prome biaha cu un seleccion di Aruba Little League ta yega asina leu, pues te na final di e bracket internacional, pues esey so caba, ta un victoria pa e seleccion. Hungadornan cu a yega asina leu, y contra un ekipo cu tabata perfecto, a toch logra mantene e wega apenas na 1 careda. Ademas, e presion tabata enorme, unda cu tur wowo tabata riba nan, asina mes nan no a rindi, y a mustra tur clase cu tabatin.

ATENCION LOCAL Y INTERNACIONALUn otro cos cu e seleccion di Aruba a logra, ta, pa uni un isla completo y cu ne, hasta Corsou, cu tambe a biba e momentonan aki e siman aki y sigur riba diasabra. Tur caminda e isla a organisa 'watch parties', esta fiesta pa wak e partido, ofreciendo special di cuminda y bebida. Pa casi tres ora, diasabra atardi, Aruba tabata keto, cu tur atencion riba e wega aki, tumando lugar miles di miya mas leu, na Williamsport, Merca. Aruba por ta orguyoso riba nan seleccion cu a mustra cara y pone nomber di Aruba hopi halto mes durante nan presentacion na Merca.