Trump lo ricibi Putin diabierna na e base militar di Alaska

ANCHORAGE  - E encuentro entre presidentenan Trump y Putin lo tuma luga na un base militar na Alaska. Varios medionan di comunicacion internacional ta reportando esaki, citando funcionarionan Mericano. Segun informe e base ta Elmendorf-Richardson, den zuid di e estado Mericano.

Segun CNN, tabatin discusionnan largo tras di cortina tocante unda e cumbre tenso por a wordo tene. Door cu tin un ordo di aresto pa Putin cerca e Corte Penal Internacional (ICC) na Den Haag, e lista di paisnan caminda e presidente ruso ta bon bini, ta limita. Finalmente, Alaska a wordo scohe. Merca no ta reconoce ICC, pues Putin no mester tin miedo di aresto einan.

Den e estado remoto aki, e opcionnan pa organisa un cumbre ta limita. E escoho di Elmendorf-Richardson ta ofrece seguridad adicional, un oficial a bisa The New York Times. E ta un asina yama base conhunto, unda tanto Ehercito Mericano como Forsa Aereo ta staciona. E base ta situa nortoost di Anchorage, e stad mas pobla di Alaska.