CTB: Mas coneccion aereo cu Aruba y Boneiru ta bon bini

WILLEMSTAD - Mas “airlift” riba e rutanan entre Kòrsou, Aruba i Boneiru ta bon biní. Tur kompania aéreo ku bini aserka ta trese mas kompetensia i ta tene otro skèrpi. Tambe e tin posiblemente un efekto positivo riba preisnan di pasashi.

Asina direktor di ofisina di turismo (CTB), Muryad de Bruin ta deklará pa EXTRA. Resientemente a bira konosí ku e kompania aéreo Bestfly Aviation, ta hasiendo trámite pa inisiá ku servisio regular di buelo entre Kòrsou, Aruba i Boneiru. E kompania a registrá un avion marka Embraer ku lo mester operá entre e tres islanan bou di un pèrmit komersial.

CTB tambe a tuma nota di esaki i segun De Bruin tin espasio pa kresementu riba e rutanan i no ta kere ku lo ta bini saturashon fásil. “Tur kos ta basá riba demanda. Niun kompania aéreo no ta kuminsá na un ruta si e no ta mira e demanda ku tin. Nos sa ku tin algun kompania ku ta operá kaba riba e rutanan, pero lo ta mira un demanda i a hasi un análisis pa kumpli ku e demanda aki.”

De Bruin ta sigui splika ku si mas kompania aéreo bula riba e rutanan pa Kòrsou, komo isla ku ta parti di e ruta entre e islanan ABC, esaki ta nifiká ku e posibilidatnan konekshon ta bira mas tantu. “E opshon pa e pasahero ta oumentá. Esaki CTB ta mira.”

E merkado di Aruba ta importante pa Kòrsou, spesífikamente pa eventonan, e direktor di CTB ta sigui indiká. “Ta mira ora ku tin evento manera Curaçao North Sea Jazz festival  òf konsiertonan tantu na Aruba komo na Kòrsou, ku e demanda pa konekshon entre Kòrsou i Aruba ta bira muchu mas grandi.” Diferente persona ku ta biaha regular entre Kòrsou, Aruba i Boneiru ta indiká na EXTRA ku ta bisto ku tin nesesidat pa mas kapasidat riba e rutanan.

Prinsipalmente den oranan di mainta i atardi ta mira un skarsedat na kapasidat. Tambe ora tin un evento riba un di e islanan ta bira difísil pa haña buelo. Esaki ta un problema pa entre otro personanan ku ta bula regular entre e islanan pa trabou i/òf negoshi.

Tambe ta mira un problema pa personanan ku mester biaha den purá di un isla pa otro, por ehèmpel pa un entiero, ku nan no por haña buelo. Algu ku normalmente lo mester por riba rutanan kòrtiku. E situashon real pa basta tempu kaba ta mustra sinembargo ku mester reservá buelo for di 1 òf 2 siman adelantá.

Bestfly ta spera riba koperashon di outoridatnan di aviashon di Kòrsou, Aruba i Boneiru pa asina nan por realisá buelo entre e 3 islanan. Meta di esaki ta pa hasi trafikashon entre e islanan mas fásil i ofresé esaki na preisnan kompetitivo. Bestfly tin algun aña aktivo kaba na Aruba kaminda ta duna servisio di buelonan “charter” rònt mundu pa entre otro komersiantenan, gobièrnunan i personanan konosí. NOTA: Texto ta scirbi den papiamento fonetico di Corsou.