Gobierno a flexibilisa sistema di permiso di trabou

ORANJESTAD – Gobierno di Aruba a anuncia flexibilacion di e sistema pa otorga permiso dialuna. Minister encarga, mr Arthur Dowers a anuncia tres servicio y metodo pa logra esaki. Basicamente e ta nifica cu personanan cu ta na Aruba aworaki, prome cu 1 di juli di e aña aki, y no tin un permiso di trabou,  por aplica awor pa esaki. Contal cu nan a yega Aruba di un forma legal, y ta cumpli cu e rekisitonan, no lo nenga nan e permiso. Algo cu prome no tabata por. A nota cu no a yama nan ‘ilegal’ sino persona cu a pasa nan fecha di estadia legal. Un nota special tambe ta, cu no mester bandona Aruba y warda e permiso den exterior. 

MOTIBO

E motibo tras di e flexibilisacion ta pa yuda facilita e mercado laboral pa por haya trahado y baha presion riba e mercado existente. Consultanan cu varios stakeholder, a resulta den un maneho manera cu Dowers a anuncia, cu ta valido pa e proximo 4 luna. Durante e periodo aki, lo tin un ekipo special di DIMAS, e departamento encarga cu otorgamento di permiso, pa atende esaki specificamente. 

FLUHO DI HENDE

Segun Dowers, e meta no ta si, pa permiti awor un fluho di hende for di exterior, pa yega Aruba y kere cu nan tambe ta haya e facilidad aki. Pasobra esaki ta e risico cu awor hende ta kere cu a habri porta pa personanan stranhero por drenta Aruba sin mas. Ta solamente pa hendenan cu a yega Aruba prome cu 1 di juli di e aña aki, y por mustra esaki pa medio di un stempel den nan paspoort cu nan a haya ora cu nan a drenta. 

REUNIFICA 

Tambe tin e cambio pa loke ta reunificacion di famia. Un casa awor di un stranhero legal, no ta permiti pa traha.  Esaki ta cambia awor, cu e stranhero ey tambe por solicita pa un permiso di trabou, y tambe studiante mayor di edad cu por drenta e mercado laboral. 

CINCO PERMISO

Pa esnan cu tin 5 permiso caba, por solicita pa un permiso di 5 aña mesora, cu ta vence ora cu yega e periodo di firma liber. E ora tin e libertad pa traha na un otro dunado di trabou of mas cu un dunado di trabou.