Parlamento di Aruba a alerta cu a ‘hack’ nan y cu tin mail cu virus circulando

ORANJESTAD – Diahuebs mainta, despues cu varios persona a cuminsa ricibi por lo menos dos email di Parlamento, cu e.o. e  mensahe ‘Approved July Statement from Parlamento di Aruba’ a bin resulta cu esaki ta un virus cu a bin despues cu a ‘hack’ e email aki di Parlamento. Esaki no ta e prome instituto cu a bira victima di hacking e simanan aki. Na Corsou, oficina di impuesto a keda afecta, y tambe na Aruba e corte di Husticia ta e ultimo victima. Awor ta parce cu Parlamento tambe a bira victima.

NOTIFICACION DI SEGURIDAD DI PARLAMENTO

Un rato despues a bin e informacion confirmando e noticia. “Nos ke pa informa nos comunidad cu un di nos cuentanan di email a keda comprometi recientemente. Si bo a ricibi algun mensahe sospechoso of straño cu ta parse di a bin di nos, por fabor no habri ningun link of attachment”. Ademas, a sigui bisa cu ta trahando   activamente pa investiga e incidente y restaura seguridad den nan sistema.