WEB a monta impresionante transporte pa reemplasa motor RECIP cu a kima na april 2024

Posted on 07/28/2025 2:43 pm AST | Updated on 07/28/2025 3:06 pm AST

ORANJESTAD – Diadomingo 27 di juli ultimo a tuma lugar transportacion exitoso di un motor RECIP nobo di waf na Barcadera pa planta di WEB na Balashi. Ta trata aki di reemplaso di e motor RECIP cu a kima na april 2024. E transportacion ta forma parti di e proyecto ‘RECIP Phase 3 DG-7 replacement’. Den curso di e siman aki lo tuma lugar un otro transporte parecido na esun di diadomingo, e biaha aki lo transporta e generator pa e motor. 

Transportacion di un motor di e taya aki ta un operacion impactante. Pa motibo di su grandura (11.3 meter largo, 5.6 m halto y 4.5 m hancho) y peso (208.000 kg), e ta rekeri ekipo specialisa pa hisamento y transporte. A pesar di su aparencia robusto, e motor ta un mashin di precision. Pa e motibo ey, e preparacion y transportacion ta ser haci cu gran cautela pa evita daño interno durante transportacion y pa no conduci na reparacionnan costoso of riesgo di seguridad. Ademas un transportacion di e taya aki ta rekeri cumplimento cu regulacionnan estricto pa maneho, documentacion y transportacion. 

WEB Aruba ta gradici tur e partidonan envolvi cu a pone cu e transportacion di e motor RECIP a surgi exitosamente. Un danki ta bay na e companianan di logistica y transportacion, na Douane, representantenan di Waf di Barcadera, cuerpo policial di Aruba KPA, Wärtsilä Finland Oy y naturalmente e team di WEB Aruba. 

Na januari 2026 lo sigui transporte di dos motor RECIP nobo mas, esaki ta den cuadro di expansion di planta RECIP fase 3, cual proyecto ta den pleno ehecucion.

  • Powered by SETAR