Corte Superior ta trata apelacion di Mike de Meza contra O.M. diamars (mayan)

ORANJESTAD – Corte di apelacion lo trata e caso di parlamentario Mike de Meza contra Ministerio Publico diamars (mayan)atardi 29 di juli 2025, pa 2’or (tambe) tras di porta cera. Abogado mr. Desiree Croes lo fungi atrobe como su abogado.

KICO TA EXIGO

Segun abogado Croes, e tin dos punto den e caso di apelacion. E prome, ta pa Ministerio Publico laga sa exactamente kico ta e acusacion cu tin contra su cliente(no solamente un articulo) pa cual ta considere actualmente un sospechoso. Esaki, pasobra segun Croes, e huez na prome instante a dicta cu ‘⁠referencia (verwijzing) na un articulo ta suficiente y cla (duidelijk genoeg)’ ;Y tambe pa duna fecha pa dicidi si tin suficiente prueba pa persigui de Meza si of no (vervolgingsbeslissing). Esaki pasobra aki e huez na prome instante a dicta cu pa pidi fecha pa tuma un decision pa persigui de Meza (vervolginsbeslissing) ta prematuro. E huez cu a dicta e sentencia aki, tabata e mes huez cu a dicidi e prome biaha, dus segun Croes, ta logico cu e lo keda riba su desicion. Awor tres diferente huez hunto, lo tin cu dicidi si e huez den prome instante tabatin razon of no, of dicidi otro. 

BIRA MINISTER

Tur e puntonan ta cu e meta principal pa libera de Meza di e cargonan y barera, pa asina finalmente e por bira minister di e gabinete AVP-FUTURO. Cu e bista aki, prome minister Eman a apunta un minister temporal pa e funcion cu de Meza lo mester a haya. Sr Rene Herde a keda apunta pa e funcion, te ora cu e asunto di de Meza keda clarifica. Y cu esaki, ta e intencion di e abogado pa libera tur e obstaculonan, y cu kier haya fecha specifico, pa no tarda e asunto mas.