Wardacosta tin contacto te ainda cu Colombia tocante e buskeda di piscadornan perdi

Wardacosta tin contacto te ainda cu Colombia tocante e buskeda di piscadornan perdi

Posted on 07/28/2025 6:53 am AST | Updated on 07/28/2025 7:10 am AST

ORANJESTAD / WILLEMSTAD - Varios media di comunicacion na Corsou y Aruba durante e weekend ultimo a scirbi cu e buskeda pa e cuater piscado arubiano disparce, despues di diessinco dia, a para oficialmente. No ta conoci riba cua informacion esaki ta basa. Bosero di Wardacosta Caribense, Miguel Perret-Gentil, a confirma diadomingo atardi cu no tin ningun cambio den e situacion.

“E buskeda a wordo entrega mas cu un siman pasa na Wardacosta di Colombia”, Perret-Gentil ta splica. E bosero ta splica cu diadomingo mainta ultimo tabatin contacto cu Wardacosta di Colombia tocante e buskeda. Segun Perret-Gentil den henter e situacion nada no a cambia. Wardacosta di Colombia te ainda ta busca e piscadonan cu a disparce, e bosero ta splica.

Diasabra 12 di juli, arubianonan Marcelo Heyden, Jarred Croes, Davey Croes yAischell Tromp a sali cu e yate Energy pa un dia di pisca na laman. Nan tabata spera pa bolbe bek e mesun dia. Pero esaki no a tuma luga. For di e siguiente dia, diadomingo 13 di juli, a cuminsa cu un buskeda pa nan.

Te awor, e boto ta perdi ainda, y no tabatin niun contacto cu e arubianonan mas. Segun Perret-Gentil Wardakosta di Colombia diadomingo mainta a confirma cu te ainda nan ta buscando y cu te ainda no tin niun informacion tocante e boto.

  • Powered by SETAR