MAN-PIN: Minister presidente Pisas mester clarifica kico ta pasando na Kas di Korsou na Hulanda

WILLEMSTAD - Frakshon di MAN/PIN a pidi Minister Presidente di Corsou, Gilmar Pisas, pa laga hasi investigashon riba tur e akusashonnan ku ta bin dilanti riba Kas di Kòrsou riba entre otro intimidashon i rumornan riba gastunan di transporte i hür. “Pa nos, minister presidente mester klarifiká i trese trankilidat na Kas di Kòrsou”. Asina parlamentario pa MAN-PIN, Suzy Camelia-Römer, ta duna di konosé durante un konferensia di prensa di e frakshon.

E rumornan ta sali ku demasiado insistensia riba retnan sosial i den prensa loke ta pone ku mester puntra Promé Minister, Gilmar ’Pik’ Pisas (MFK), pa duna aklarashon di kiko ta pasando, Camelia-Römer ta bisa. E ta splika ku e minister plenipotensiario ta un persona apoderá pa Konseho di Minister di Kòrsou. “E no por hasi nada ku e Konseho di Minister no a instruyé pa hasi.”

Ku otro palabra, e parlamentario ta mustra ku tur loke e minister plenipotensiario hasi ta kai bou di responsabilidat di Minister Presidente. “Pues si tin indikashonnan ku a hasi gastu ku no por responsabilisá, ta e Minister Presidente ta responsabel. Tin akusashon di hürmentu di kas i intimidashon di personal, pero no sa ku esakinan ta bèrdat.”

Camelia-Römer bisa mas aleu: “Loke sí nos sa ta ku e asuntunan aki ta daña imágen di pais na Hulanda i Kòrsou. Minister Presidente mester laga hasi un ouditoria riba e parti finansiero i alabes laga hasi un investigashon bou di e personal pa asina sea saka e rumornan for di mundu si nan no ta bèrdat,òf si ta bèrdat atendé ku e situashon. Pero, no por laga e situashon akí sigui manera e ta bai.” NOTA: Texto ta scirbi den papiamento fonetico di Corsou.